சிட்டி

சிட்டி

சிட்டி (பெ.கோ. சுந்தரராஜன்)

சிட்டி

சிட்டி (பெ.கோ. சுந்தரராஜன்) (ஏப்ரல் 15, 1910 - ஜூன் 24, 2006) நவீனத்தமிழ் எழுத்தாளர்களில் ஒருவர். இதழாசிரியர், இலக்கிய ஆய்வாளர், இலக்கிய, திரைப்பட விமர்சகர், இலக்கியச் செயற்பாட்டாளர். இணைத்தயாரிப்பு முறையில் எழுதுவதன் மேல் நம்பிக்கை கொண்டிருந்தார். சோ.சிவபாதசுந்தரம், கு.ப.ராஜகோபாலன், பெ.சு. மணி, தி. ஜானகிராமன் ஆகியோருடன் இணைந்து எழுதினார். மணிக்கொடி காலகட்ட எழுத்தாளர்களில் ஒருவர். நாவல், சிறுகதைகள், விமர்சனக் கட்டுரைகள் எழுதினார். குறிப்பாக இன்று இலக்கிய வரலாற்றாசிரியர் என அறியப்படுகிறார்.

பிறப்பு, கல்வி

சிட்டியின் இயற்பெயர் பெ.கோ. சுந்தரராஜன். இவர் தமிழ்நாட்டின் மதுரை மாவட்டம் நத்தம் கிராமத்தில் பி.எஸ்.கோவிந்தசுவாமி, வெங்கலெட்சுமி இணையருக்கு ஏப்ரல் 15, 1910-ல் பிறந்தார். தெலுங்கைத் தாய்மொழியாகக் கொண்டவர்.

சிட்டி பள்ளிக்கல்விக்குப்பின் பச்சையப்பன் கல்லூரியில் பயின்று வரலாற்றில் பி.ஏ.எல்.டி பட்டம் பெற்றார். அங்கு சி.என்.அண்ணாத்துரை அவரது சக மாணவ நண்பராக இருந்தார். கல்லூரியின் வரலாற்றுக்கழகத்தின் தலைவராக அண்ணாத்துரையும் செயலராக சிட்டியும் செயல்பட்டனர்.

தனி வாழ்க்கை

சிட்டி அகில இந்திய வானொலியின் முதுநிலை நிருபராக சென்னையில் பணியாற்றினார்.

சிட்டியின் மனைவி பெயர் ஜானகி. இவர்களுக்கு ஐந்து மகன்கள், ஒரு மகள். சிட்டியின் மூத்த புதல்வர் விஸ்வேஸ்வரன், கு.சின்னப்ப பாரதியின் நாவல்கள் உள்படப் பல தமிழ்ப் படைப்புகளை ஆங்கிலத்தில் மொழியாக்கம் செய்தார்.

ஆசிரியப்பணி

சிட்டியும் சிவபாதசுந்தரமும்

சிட்டி மதுரைக் காமராசர் பல்கலைக்கழகத்தின் சிறப்புப் பேராசிரியராகப் பணியாற்றினார்.

இதழியல்

• சிட்டி 'நூலகம்' பத்திரிக்கையின் ஆசிரியராக இருந்தார். பொதுவாக இலக்கியத்துக்கும், சிறப்பாக விமரிசனத்துறைக்கும் முக்கியத்துவம் அளித்தும் இதழ் வெளிவந்தது.

• 'அகில இந்திய வானொலி' இதழின் பொறுப்பாசிரியர்

இலக்கிய வாழ்க்கை

சிட்டி தொடக்ககாலத்தில் நகைச்சுவைக் கட்டுரைகளை ஆங்கிலத்தில் எழுதினார். வ.ரா-வின் தூண்டுதலால் தமிழில் எழுத ஆரம்பித்தார். சற்றேறக்குறைய ஐம்பது சிறுகதைகள் எழுதினார். கதை, கவிதை, நாடகம், வாழ்க்கை வரலாறு ஆகியவற்றை தமிழ் மற்றும் ஆங்கிலம் என இரு மொழிகளிலும் எழுதினார். இலக்கிய உலகில் வ.ரா, கு.ப.ரா, புதுமைப்பித்தன், சி.சு. செல்லப்பா, தி. ஜானகிராமன், சோ.சிவபாதசுந்தரம், சுந்தா சுந்தரலிங்கம் ஆகியோருடனும் நெருக்கமான நட்பை பேணியவர். கே. ஏ. நீலகண்ட சாஸ்திரி, வெரியர் எல்வின் போன்றோரின் நூல்களைத் தமிழில் மொழியாக்கம் செய்தார்.

புனைவிலக்கியம்

சிட்டி சிறுகதைகளும் நாவலும் எழுதியுள்ளார். அவரைப் பற்றி மதிப்பிடும் பழ. அதியமான் 'அவரது அநேகக் கதைகள் ஏதோ ஒன்றின் எதிரொலிகளாக இருப்பதை சோ. சிவபாதசுந்தரம் மூலம் அறியலாம். சிட்டியின் 'புரியாத கதை', கு.ப.ரா.வின் 'புரியும் கதை'க்கு எதிர்மறை. தி. ஜானகிராமனின் 'மறதி' கதைக்கு மறுப்பு 'வழியிலே வந்தவள்'. புதுமைப்பித்தனின் 'சாபவிமோசன'த்தின் தாக்கம் 'மாசறு கற்பினாள்' என்று குறிப்பிடுகிறார்.

நையாண்டி இலக்கியம்

சிட்டி தமிழ் நவீன இலக்கியத்தின் பரப்பில் குறைவாக இருந்த நையாண்டி இலக்கியத்தின் தொடக்க காலத்து எழுத்துக்களை உருவாக்கியவர். மணிக்கொடி உள்ளிட்ட நவீன இலக்கிய இதழ்களில் நையாண்டிக்கவிதைகள், சிறிய கட்டுரைகள் மற்றும் கதைகளை எழுதினார். அக்கால இலக்கியப்போக்குகளையும் இலக்கியவாதிகளையும் சமூகப்பிரச்சினைகளையும் கேலி செய்து அவர் எழுதியவை அன்றைய இலக்கியச் சூழலின் இலட்சியவாத போக்கு, எதிர்மனநிலைகொண்ட விமர்சனப் போக்கு ஆகிய இரண்டுக்கும் மாற்றாக அமைந்தன. ஆனால் சிட்டியின் நையாண்டி எழுத்து அன்றைய சமூகச் சூழலின் ஒரு சிறு உள்வட்டத்தின் ரசனைக்குரியதாக மட்டுமே அமைந்தது.

இணைத்தயாரிப்பு முறை

சிட்டி இணைத்தயாரிப்பு முறையில் எழுதுவதன் மேல் நம்பிக்கை கொண்டிருந்தார். இலக்கிய விமர்சனத்தை கு.ப.ராஜகோபாலனுடன் இணைந்து நடத்தினார். இலக்கிய ஆய்வுகளை சோ. சிவபாதசுந்தரத்துடன் இணைந்து நிகழ்த்தினார். தி.ஜானகிராமனுடன் இணைந்து பயண இலக்கியத்தை நிகழ்த்தினார். பெ.சு.மணியுடன் இணைந்து வாழ்க்கை வரலாறுகளை எழுந்தினார்.

இலக்கிய ஆய்வுகள்

சிட்டி இலக்கிய ஆய்வுகளை அன்றைய இலக்கிய விவாதங்களின் ஒரு பகுதியாகவே எழுதத் தொடங்கினார். சிட்டியின் இலக்கிய ஆய்வுகள் தெளிவான இலக்கிய அழகியல்கொள்கைகள் அல்லது சமூகவியல் கொள்கைகளைச் சார்ந்தவை அல்ல. அவர் இணை எழுத்தாளராகவே அந்த ஆய்வுகளில் செயல்பட்டார்.

கண்ணன் என் கவி

சிட்டியின் முதல் இலக்கிய ஆய்வுநூல் கண்ணன் என் கவி. இந்நூல் அவர் கு.ப.ராஜகோபாலனுடன் இணைந்து எழுதியது. கல்கி பாரதியாரை ஒரு மகாகவி என்று சொல்லமுடியாது என்னும் விமர்சனத்தை முன்வைக்க அதற்குப் பதிலாக இந்நூல் எழுதப்பட்டது. பாரதி ஏன் மகா கவி என இந்நூல் விவாதிக்கிறது. பாரதி மகாகவியா விவாதம்.

ஆதியூர் அவதானி

சிட்டி- சிவபாதசுந்தரம் இருவரும் இணைந்து செய்த ஆய்வுகளின் விளைவாக தமிழில் எழுதப்பட்ட தொடக்ககால செய்யுள் கதையான ஆதியூர் அவதானி நூறாண்டு இடைவெளிக்குப் பின்னர் அச்சேறியது. சிட்டியும் சிவபாதசுந்தரமும் அதை முதல் தமிழ்நாவல் எனலாம் என்று வாதிட்டனர். ஆனால் செய்யுளில் அமைந்த அதை நாவல் என கொள்ளமுடியாது என்று இலக்கிய விமர்சகர்கள் ஏற்கவில்லை.

இலக்கிய வரலாற்றெழுத்து

தமிழில் முறையான ஆய்வுப்புலமும், தரவுகளின் தொகுப்பும் கொண்ட இலக்கிய வரலாற்றெழுத்து நூல்கள் சிட்டி- சிவபாதசுந்தரம் இருவரும் இணைந்து உருவாக்கியவை. இரு நூல்கள் அவ்வகையில் பிற்காலத்து ஆய்வுகள் அனைத்துக்கும் அடிப்படையானவையாகக் கருதப்படுகின்றன. தமிழ்நாவல் உருவான வரலாற்றை முழுமையான தரவுகளுடன் சொல்லும் 'தமிழ் நாவல் நூறாண்டு வரலாறும், வளர்ச்சியும்' ( 1977) தமிழ்ச்சிறுகதையின் தோற்றம் வளர்ச்சி ஆகியவற்றை வரலாற்றுபூர்வமாக விவரிக்கும் தமிழ்ச் சிறுகதை: வரலாறும் வளர்ச்சியும் (1989) ஆகிய நூல்கள் முக்கியமான பங்களிப்புகள்.

பயண இலக்கியம்

சிட்டி தி.ஜானகிராமனுடன் இணைந்து எழுதிய நடந்தாய் வாழி காவேரி தமிழ் பயண இலக்கியத்தில் முக்கியமான ஒரு படைப்பாக கருதப்படுகிறது.

கடித இலக்கியம்

சிட்டிக்கு எழுத்தாளர் கிருத்திகாவுடன் நீண்ட கால நட்பு இருந்தது. தில்லியிலும், பல்வேறு நகரங்களிலும் வசித்த கிருத்திகா சிட்டிக்கு எழுதிய கடிதங்களும், சிட்டி அவருக்கு எழுதிய பதில் கடிதங்களும் சிட்டியின் மருமகன் நரசய்யாவின் முன்னுரையுடன் 'Lettered Dialogue' என்ற நூலாக பழனியப்பா பதிப்பகத்தால் வெளியிடப்பட்டன. வெளியீட்டு விழா மேற்கு வங்க ஆளுநர் கோபால கிருஷ்ண காந்தியின் தலைமையில் நடைபெற்றது.

வாழ்க்கை வரலாறு

பெ.சு. மணியுடன் இணைந்து சிட்டி வ.ராமசாமி ஐயங்காரின் வாழ்க்கையை 'அதிசயப் பிறவி வ.ரா. வரலாறு' என்னும் நூலாக எழுதினார்.

இலக்கியச் செயல்பாடுகள்

• லட்சுமி கிருஷ்ணமூர்த்தி சென்னை வாசகர் வட்டம் என்ற பதிப்பகத்தை தொடங்கி பல நூல்களை வெளியிடுவதற்கு சிட்டி சுந்தரராஜன் உறுதுணையாக இருந்தார்.
• ஆரம்பத்தில் ஸ்டாலின் சீனிவாசன் வீட்டிலும், பின்னர் லட்சுமி கிருஷ்ணமூர்த்தி வீட்டிலும் மாதம் ஒரு முறை நிகழ்ந்த வெள்ளி வட்டக் கூட்டம் என்னும் இலக்கியக் கூட்டத்தின் ஒருங்கிணைப்பாளராக இருந்தார்.
• ஆய்வாளர்களுக்கு உதவும்பொருட்டு அரங்கம் என்னும் அமைப்பை சிட்டி முன்னின்று நடத்திவந்தார்.
• சிட்டி 1980-களில் சென்னையில் மணிக்கொடிக்குப் பொன் விழாவை நடத்தினார்.

ஆன்மிகம்

சிட்டி தொடக்க காலகட்டத்தில் மணிக்கொடி இலக்கியக்குழுவின் மறுமலர்ச்சிச் சிந்தனைகளைச் சார்ந்தவராக இருந்தாலும் இறுதிக்காலகட்டத்தில் காஞ்சி மடாதிபதி சந்திரசேகர சரஸ்வதியின் அடியாராக தன்னை முன்வைத்தார். அவருடைய வாழ்க்கைவரலாற்றையும் எழுதினார்.

மறைவு

சிட்டி ஜூன் 24, 2006-ல் தன் தொண்ணூற்று ஆறாவது வயதில் காலமானார்.

விருதுகள்

• 1981-ல் மதுரையில் நடைபெற்ற ஐந்தாவது உலகத்தமிழாராய்ச்சி மாநாட்டில் இந்தியப் பிரதமரால் கௌரவிக்கப்பட்டார்.
• 1989 ல் சிட்டி, சோ. சிவபாதசுந்தரத்துடன் இணைந்து எழுதிய 'தமிழ்ச் சிறுகதை: வரலாறும் வளர்ச்சியும்' என்ற நூலுக்கு 'இலக்கியச் சிந்தனை' விருது கிடைத்தது.

விவாதங்கள்

சிட்டி தன் சிறுகதை வரலாற்று நூலில் புதுமைப்பித்தன் தழுவல் விவாதத்தை எழுப்பினார். அது தொடர்ச்சியான எதிர்ப்புகளை அடைந்தது.

வாழ்க்கை வரலாறு

சிட்டியின் வாழ்க்கை குறித்து நரசய்யா எழுதிய 'சாதாரண மனிதன்' என்ற நூல் 2002-ல் வெளியானது.

சிட்டி நூற்றாண்டு விழா

சிட்டி நூற்றாண்டுவிழாவை ஜூலை 18, 2010-ல் அவருடைய உறவினர் நரசய்யா முன்னின்று நடத்தினார். சிட்டியின் நண்பர் வீரராகவன் அதற்கு பெருமுயற்சி எடுத்துக்கொண்டதாக நரசய்யா தெரிவிக்கிறார்.

எழுத்துமுறை

சிட்டி தன்னை-' I Am A Chronicler of Literature' - என்றே அறிமுகப்படுத்திக்கொள்ள விரும்பியவர். 'ஏன் இவ்வாறு மற்றொருவருடன் இணைந்து சில முக்கியமான நூல்களை எழுதியிருக்கிறீர்கள்?' ஞாநி சிட்டியிடம் கேட்டபொழுது, "அதற்குக் காரணம் என் சோம்பல்தான். என்னால் பொறுமையாக உட்கார்ந்து நிறைய எழுத முடியாது. ஆனால் தகவல்களைத் திரட்டுவது ஒழுங்குபடுத்திப் பிரிப்பது பிறகு கோர்வைப்படுத்தி அதன் அடிப்படையில் டிக்டேட் செய்வது எல்லாம் எனக்கு சுலபம்" என சிட்டி சுபமங்களாவிற்கு 1992-ல் அளித்த நேர்காணலில் குறிப்பிட்டார்.

இலக்கிய இடம்

சிட்டி மணிக்கொடி இதழைச் சார்ந்து உருவான இலக்கிய அலையின் ஒரு பகுதியாக வரலாற்றுரீதியாக மதிப்பிடப்படுகிறார். ஆனால் அவருடைய இலக்கியப்படைப்புகள் முக்கியமானவையாக கருதப்படவில்லை. "இவருடைய எழுத்துக்களில் நகைச்சுவையும், கிண்டலும் இருக்கும். நவீனத்துவம் சார்ந்த பார்வை கொண்டவராக புனைவுகளில் வெளிப்பட்டாலும் அவை தட்டையான இயங்குதன்மை கொண்டவையாக இருந்தன. நவீன சிறுகதை மரபின் செழுமைக்குப் பங்களிப்பாற்றியவர்களில் ஒருவர் எனக் கூற இயலாது. ஏனைய மணிக்கொடி எழுத்தாளர்களை ஒப்பிடும்போது தனித்து வித்தியாசமான உலகம் நோக்கி வாசகரை அழைத்துச் செல்லும் பண்புகள் கொண்டவை அல்ல. புதுமைப்பித்தன் மேலான சிட்டியின் விமர்சனம் நேரடித்தன்மை கொண்டதல்ல. சிட்டி இணைத்தயாரிப்பு முயற்சிகள் வழியாக எழுதிய நூல்கள் ஆய்வு, வரலாற்று நோக்கில் கணிப்பு மிக்கவை" என டி. மதுசூதனன் மதிப்பிடுகிறார்.

சிட்டியின் இலக்கிய இடம் மூன்று வகைகளில் வரையறைசெய்யப்படலாம்.

• தமிழின் நவீன இலக்கியப்பரப்பில் தொடக்ககால நையாண்டி எழுத்துக்களை உருவாக்கியவர்.
• தமிழ் பயண இலக்கியத்தின் சிறந்த படைப்புகளில் ஒன்றின் இணையாசிரியர்
• தமிழின் முதன்மையான இலக்கிய வரலாற்றுநூல்களின் இணையாசிரியர்.

நூல் பட்டியல்

நாவல்

• பத்ம சாகஸம் (1936)

சிறுகதைத் தொகுப்பு

• அந்திமந்தாரை (1945)
• தாழை பூத்தது
• மதுவிலக்கு மங்கை (1938)

இணைஆசிரியர்

• கண்ணன் என் கவி (கு.ப.ரா-வுடன்) 1937
• நடந்தாய் வாழி காவேரி (தி.ஜானகிராமனுடன்) 1971
• தமிழ் நாவல் நூறாண்டு வரலாறும், வளர்ச்சியும் (சோ.சிவபாதசுந்தரத்துடன்) -1977
• தமிழ்ச் சிறுகதை: வரலாறும் வளர்ச்சியும் (சோ.சிவபாதசுந்தரத்துடன்)- 1989
• அதிசயப் பிறவி வ.ரா. வரலாறு (பெ.சு.மணியுடன் இணைந்து)

பிற

• சில விஷயங்கள் (நகைச்சுவைக் கட்டுரைகள்)
• மண்ணாங்கட்டி

மொழியாக்கம்

• எல்வின் கண்ட பழங்குடி மக்கள்(The Tribal world of Verrier Elwin: an autobiography)
• தமிழர் பண்பாடும் வரலாறும் (The Culture and History of the Tamils - K.A.Neelakanda Sastri)

ஆங்கிலத்தில்

• The Life of Satyamurthi (South Asia books, Delhi)
• Paramacharya

உசாத்துணை

• சிட்டி - முருகபூபதி: ஜெயமோகன் தளம்
• சிட்டி பெ.கோ. சுந்தரராஜன்: தெ. மதுசூதனன் - தென்றல் வலைதளம்
• சிட்டி சுந்தரராஜன் - பசு பதிவுகள்
• சிட்டி 10 தமிழ் ஹிந்து நாளிதழ்
• விடைபெறும் கடைசிக் குரல்- காலச்சுவடு
• சிட்டி- தி.ஜா நினைவு
• சிட்டியின் அந்திமந்தாரை மதிப்பீடு செல்லப்பா
• சிட்டி நூற்றாண்டு நரசய்யா

‎

---

✅Finalised Page

முதலில் வெளியிடப்பட்ட தேதி: 19-Jul-2024, 17:18:08 IST