அகராதி நூல்கள்
ஒரு மொழியில் உள்ள சொற்களை அகர வரிசைப்படித் தொகுத்து, அதற்கான பொருளைத் தரும் நூல்கள் ‘அகர முதலி’ என்றும் ‘அகராதி’ என்றும் அழைக்கப்படுகின்றன. அகரத்தை முதன்மையாகக் கொண்டு தொகுக்கப்பட்டுள்ளதால், ‘அகர முதலி’; அகரம் + ஆதி = அகராதி. தமிழில் பல்வேறு அகராதி நூல்கள் பயன்பாட்டில் உள்ளன. வீரமாமுனிவர் இயற்றிய ‘சதுரகராதி’, தமிழின் முதல் அகராதி நூலாகக் கருதப்படுகிறது.
தமிழில் அகராதி நூல்கள் தோற்றம்
அகராதியின் பயன், ஒரு சொல்லுக்கு உரிய பல பொருள்களையும், அப்பொருள்களுக்குரிய பெயர் விளக்கங்களையும் தருவதாகும். பண்டைக் காலத்தில் இவை ‘நிகண்டுகள்’ என அழைக்கப்பட்டன. நிகண்டுகள், அகராதிகள் தோன்ற அடிப்படைக் காரணமான நூல் தொல்காப்பியம். தொல்காப்பியர், தொல்காப்பியச் சொல்லதிகாரத்தின் உரியியலில், 120 உரிச்சொற்களின் பொருளை நூற்பாவில் அறிவித்துள்ளார் . இதனை அடிப்படையாக வைத்தே தொல்காப்பியர் காலத்திற்குப் பின் ‘உரிச்சொல் பனுவல்களும், நிகண்டுகளும் தோன்றின. இவையே காலமாற்றத்திற்கேற்ப விரிவு கொண்டு அகராதிகளாயின.
தமிழ் அகராதி நூல்களின் பட்டியல்
தமிழின் முதல் அகராதி நூல், வீரமாமுனிவர் இயற்றிய ‘சதுரகராதி’. இது பொதுயுகம் 1732-ல் உருவானது. இதனை அடுத்து, 1779-ல், பெப்ரியஸ் பாதிரியார், ‘பெப்ரிசியஸ் அகராதி'யைத் தொகுத்து வெளியிட்டார். தொடர்ந்து பல அகராதி நூல்கள் வெளியாகின.
எண் | ஆண்டு | அகராதியின் பெயர் | ஆசிரியர்/பதிப்பாளர் |
1 | 1732 | சதுரகராதி | வீரமாமுனிவர் |
2 | 1779 | பெப்ரிசியஸ் அகராதி | பெப்ரியஸ் பாதிரியார் |
3 | 1834 | ராட்லர் தமிழ் அகராதி (நான்கு பாகங்கள்) | ராட்லர் |
4 | 1842 | மானிப்பாய் அகராதி | யாழ்ப்பாணம், சந்திரசேகரபண்டிதர் & சரவணமுத்துப்பிள்ளை |
5 | 1850 | சொற்பொருள் விளக்கம் | அண்ணாசாமிப் பிள்ளை |
6 | 1862 | வின்ஸ்லோ-தமிழ் அகராதி | வின்ஸ்லோ |
7 | 1869 | போப்புத் தமிழ் அகராதி | ஜி.யு. போப் |
8 | 1883 | அகராதிச் சுருக்கம் | விஜயரங்க முதலியார் |
9 | 1893 | பேரகராதி | காஞ்சிபுரம் இராமசாமி நாயுடு |
10 | 1897 | தரங்கம்பாடி அகராதி (பெப்ரிசியசு அகராதியின் விரிவு) | பெப்ரியஸ் பாதிரியார் |
11 | 1899 | தமிழ்ப் பேரகராதி (வித்தியாரத்நாகர அச்சியந்திரசாலை) | நா. கதிரைவேற் பிள்ளை, யாழ்ப்பாணம் |
12 | 1901 | தமிழ்ப் பேரகராதி (நிரஞ்சனவிலாச அச்சியந்திர சாலை) | நா. கதிரைவேற் பிள்ளை, யாழ்ப்பாணம் |
13 | 1904 | தமிழ்ச் சொல்லகராதி (அகரம் மட்டும்) | கு. கதிரைவேற் பிள்ளை, யாழ்ப்பாணம் |
14 | 1908 | சிறப்புப் பெயர் அகராதி | ஈக்காடு இரத்தினவேலு முதலியார் |
15 | 1909 | இருபதாம் நூற்றாண்டுத் தமிழகராதி | பி. ஆர். இராமநாதன் |
16 | 1910 | அபிதான சிந்தாமணி | ஆ. சிங்காரவேலு முதலியார் |
17 | 1910 | தமிழ்ச் சொல்லகராதி-மூன்று தொகுதிகள் (மதுரைத் தமிழ்ச்சங்க வெளியீடு) | கு. கதிரைவேற்பிள்ளை |
18 | 1911 | தமிழ்மொழி அகராதி | காஞ்சி நாகலிங்க முனிவர் |
19 | 1914 | இலக்கியச் சொல்லகராதி | அ. குமாரசுவாமிப் பிள்ளை, சுன்னாகம் |
20 | 1921 | மாணவர் தமிழ் அகராதி | எஸ். அனவரதவிநாயகம் பிள்ளை |
21 | 1924 | சொற்பொருள் விளக்கம் என்னும் தமிழகராதி | ச. சுப்பிரமணிய சாஸ்திரி |
22 | 1925 | தற்காலத் தமிழ்ச்சொல் அகராதி | ச. பவானந்தம் பிள்ளை |
23 | 1926 | தமிழ் லெக்சிகன் | சென்னைப் பல்கலைக்கழகம் |
24 | 1928 | இளைஞர் தமிழ்க் கையகராதி | மே. வீ. வேணுகோபாலப் பிள்ளை |
25 | 1935 | ஜூபிலி தமிழ்ப் பேரகராதி | சங்கரலிங்க முதலியார் |
26 | 1935 | ஆனந்தவிகடன் அகராதி | ஆனந்தவிகடன் ஆசிரியர் குழு |
27 | 1935 | நவீன தமிழ் அகராதி | சி. கிருஷ்ணசாமிப் பிள்ளை |
28 | 1937 | மதுரைத் தமிழ்ப் பேரகராதி | பண்டிதர் பலர் - இ. மா. கோபாலகிருஷ்ணக் கோனார் வெளியீடு |
29 | 1938 | சொற்பிறப்பு ஒப்பியல் தமிழ் அகராதி | ரெ. எஸ். சுவாமி ஞானப்பிரகாசம் |
30 | 1939 | தமிழறிஞர் அகராதி | சி. கிருஷ்ணசாமிப் பிள்ளை |
31 | 1939 | தமிழமிழ்த அகராதி | சி.கிருஷ்ணசாமிப் பிள்ளை |
32 | 1939 | விக்டோரியா தமிழ் அகராதி | எஸ். குப்புஸ்வாமி |
33 | 1940 | கழகத் தமிழ்க் கையகராதி | சேலை சகதேவ முதலியார் & காழி சிவகண்ணுசாமிப்பிள்ளை |
34 | 1950 | செந்தமிழ் அகராதி | ந.சி. கந்தையாப் பிள்ளை |
35 | 1951 | கம்பர் தமிழ் அகராதி | வே. இராமச்சந்திர சர்மா |
36 | 1955 | சுருக்கத் தமிழ் அகராதி | கலைமகள் ஆபீஸ் |
37 | 1955 | கோனார் தமிழ்க் அகராதி (கையடக்கப் பதிப்பு) | ஐயன்பெருமாள் கோனார் |
38 | 1957 | தமிழ் இலக்கிய அகராதி | பாலூர். து. கண்ணப்ப முதலியார் |
39 | 1964 | கழகத் தமிழ் அகராதி | கழகப் புலவர் குழு-சைவ சித்தாந்த நூற்பதிப்புக் கழகம் |
40 | 1969 | லிப்கோ தமிழ்-தமிழ் அகராதி | லிஃப்கோ நிறுவணம் |
41 | 1979 | மணிமேகலைத் தமிழகராதி | மணிமேகலைப் பிரசுரம் |
42 | 1980 | தமிழ்ச் சுருக்கெழுத்து அகராதி | அனந்தநாராயணன் |
43 | 1984 | தமிழ்-தமிழ் அகரமுதலி | மு.சண்முகம்பிள்ளை (தொகுப்பாசிரியர்) |
44 | 1984 | செந்தமிழ்ச் சொற்பிறப்பியல் பேரகர முதலி | ஞா. தேவநேயப் பாவாணர் |
45 | 1989 | தமிழ் இலக்கியக் கலைச்சொல் அகராதி | டாக்டர் ப. கோபாலன் |
46 | 2009 | தமிழிலக்கிய குறியீடுகள் அகராதி | அன்னிதாமசு, ஜெ. சரஸ்வதி |
47 | 2010 | பெருஞ்சொல் அகராதி | தமிழ்ப் பல்கலைக்கழகம், தஞ்சாவூர் |