அ. ஜாகிர் ஹுசைன்

ஜாகீர் ஹூசைன்

அ. ஜாகிர் ஹுசைன் கவிஞர், எழுத்தாளர், மொழிபெயர்ப்பாளர், மற்றும் பேராசிரியர்.

ஜாகிர் ஹுசைன் திருக்குறளை முதன்முதலில் தமிழிலிருந்து நேரடியாக அரபியில் மொழியாக்கம் செய்தவர். ஆத்திசூடி, பாரதியார் கவிதைகள், பாரதிதாசன் கவிதைகள் உள்ளிட்ட தமிழின் முதன்மையான நூல்களையும் தமிழறிஞர்களையும் அரபுலகிற்கு அறிமுகம் செய்துவருகிறார். சென்னை பல்கலைக்கழகத்தின் அரபு, பாரசீகம் & உருதுத்துறைத் தலைவராக பணியாற்றிக் கொண்டிருக்கிறார். மொழிபெயர்ப்பிற்காக தமிழ்நாடு அரசின் சிறந்த மொழிபெயர்ப்பாளர் விருது உட்பட பல்வேறு விருதுகளை பெற்றிருக்கிறார்.

பிறப்பு, இளமை & கல்வி

ஜாகிர் ஹுசைன் மே 25, 1971-l கன்னியாகுமரி மாவட்டம் தக்கலையில் சுலைஹா பீவி, அகமது இணையருக்கு மகனாகப் பிறந்தார். தந்தை தமிழ்நாடு அரசின் ஆரம்ப சுகாதாரத் துறையில் ஆய்வாளராகப் பணியாற்றியவர். ஜாகிர் ஹுசைனின் உடன் பிறந்தவர்கள் ஆறு பேர்.

தக்கலை அரசு முஸ்லிம் துவக்கப்பள்ளியில் ஐந்தாம் வகுப்பை முடித்த ஜாகிர் ஹுசைன், தக்கலை அரசு மேனிலைப்பள்ளியில் பத்தாம் வகுப்புவரை தமிழ் வழியில் பயின்றார். அதன்பின் தாயாரின் ஆசைப்படி இஸ்லாமிய இறையியல் கல்வியில் ஈடுபட்டார். சென்னைப் பல்கலைக்கழகத்தின் உறுப்புக் கல்லூரியாக இருந்த வேலூர் அல்பாகியாதுஸ் ஸாலிஹாத் அரபுக் கல்லூரியில் 1994-ம் ஆண்டு 'பாகவி' மார்க்க அறிஞர் பட்டமும், 'அப்சலுல் உலமா' பட்டமும் பெற்றார்.

தந்தையின் வழிகாட்டுதலின் படி இறையியல் கல்வியைப் படிக்கும்போதே பன்னிரண்டாம் வகுப்பை தனியாகவும், சென்னைப் பல்கலைக்கழகத்தில் தொலைதூரக் கல்வியின் மூலம் வரலாற்றுத் துறையில் இளங்கலைப் படிப்பையும் முடித்தார். அதன்பின் 1998-ம் ஆண்டு, சென்னைப் பல்கலைக்கழகத்தின் அரபுத் துறையில் முதுகலை பட்டமும், 2005-ம் ஆண்டு பேராசிரியர் நிசார் அஹ்மது நெறியாள்கையின் கீழ் அரபு இலக்கியத்தில் முனைவர் பட்டமும் பெற்றார். சென்னைப் பல்கலைக்கழகத்தில் ஊடகத்துறையில் டிப்ளமோ பட்டமும் பெற்றார்.

அல்லாமா T.J.M. சலாஹுத்தீன் ஹழ்ரத், அல்லாமா கமாலுத்தீன் ஹழ்ரத், அல்லாமா ஷப்பீர் அலி ஹழ்ரத், அல்லாமா முஹம்மத் கான் பாகவி ஹழ்ரத், பேராசிரியர் நிசார் அஹ்மத் உள்ளிட்ட அறிஞர்கள் ஜாகிர் ஹுசைனின் கல்விப் பயணத்தில் முக்கியமான பங்களிப்பைச் செய்திருக்கிறார்கள் என்று குறிப்பிடுகிறார். இவருக்கு தமிழ் மீது ஈடுபாட்டை ஏற்படுத்தியவர்களில் முக்கியமானவர் அப்துல் ரகுமான் என்று குறிப்பிடுகிறார்.

தனிவாழ்க்கை

ஜூலை 2, 2000-ல் பாத்திமாவை திருமணம் செய்துகொண்டார். பாத்திமா சென்னை, நுங்கம்பாக்கம் கிரசண்ட் பெண்கள் மேனிலைப்பள்ளியில் அரபுமொழி ஆசிரியராக பணியாற்றி வருகிறார். இவர்களின் மகன் ஜாபிர் ஹுசைன், ஜெர்மனியிலுள்ள ஒரு பல்கலைக்கழகத்தில் இயந்திரவியல் துறையில் முதுகலை பயின்றுவருகிறார். மகள் பஸீஹா மர்யம், சென்னை, ஸ்டெல்லா மேரிஸ் கல்லூரியில் இளங்கலை பொருளாதாரம் பயின்று கொண்டிருக்கிறார்.

ஆசிரியர் பணி

பள்ளப்பட்டி உஸ்வத்துன் ஹஸனா அரபுக் கல்லூரி, சென்னை புதுக்கல்லூரி, திருநெல்வேலி சதக்கத்துல்லா அப்பா கல்லூரி ஆகிய கல்லூரிகளில் அரபுத்துறையில் உதவிப் பேராசிரியராகப் பணி என இருபது ஆண்டுகளுக்கும் மேலாக பல்வேறு இடங்களில் பணியாற்றிய ஜாகிர் ஹுசைன், அவர் பயின்ற சென்னைப் பல்கலைக்கழகத்திலேயே அரபுத்துறையில் உதவிப் பேராசிரியராக பிப்ரவரி 19, 2008-ல் நியமிக்கப்பட்டார். தற்போது துறைத் தலைவராக செயல்பட்டுவருகிறார்.

ஆசிரியர் பணி தொடர்பான பொறுப்புகள்

ஜாகிர் ஹுசைன் சென்னைப் பல்கலைக்கழகம், பாண்டிச்சேரி பல்கலைக்கழகம், சேலம் பெரியார் பல்கலைக்கழகம் ஆகிய பல்கலைக்கழகங்களின் அரபுமொழி பாடத்திட்டக் குழுத் தலைவராக பொறுப்புவகிக்கிறார்.

கோழிக்கோடு பல்கலைக்கழகம், கண்ணூர் பல்கலைக்கழகம், உஸ்மானியா பல்கலைக்கழகம், கேரளா பல்கலைக்கழகம், மதுரை காமராஜர் பல்கலைக்கழகம், சென்னை கிரசண்ட் பல்கலைக்கழகம் உள்ளிட்ட இந்தியாவிலுள்ள பல்வேறு பல்கலைக்கழகங்களிலும் கல்லூரிகளிலும் பாடத்திட்டக்குழு, தேர்வுக்குழு, முனைவர் ஆய்வு கண்காணிப்புக் குழு ஆகிய குழுக்களில் உறுப்பினராக பொறுப்பு வகிக்கிறார்.

ஆய்வுப் பணி

பேராசிரியர் ஜாகிர் ஹுசைன் நெறியாள்கையில் 14 மாணவர்கள் அரபு இலக்கியத்தில் முனைவர் பட்டம் பெற்றிருக்கிறார்கள். 50 மாணவர்கள் இளநிலை ஆய்வு பட்டம் பெற்றிருக்கிறார்கள். 6 மாணவர்கள் முனைவர் பட்ட ஆய்வு மேற்கொண்டு வருகிறார்கள்.

கருத்தரங்குகள், பயிலரங்குகள்

ஜாகிர் ஹுசைன் இருபத்தைந்துக்கும் அதிகமான சர்வதேசக் கருத்தரங்குகளிலும், முப்பதுக்கும் அதிகமான தேசியக் கருதரங்குகளிலும் கலந்துகொண்டு ஆய்வுக் கட்டுரைகளைச் சமர்ப்பித்துள்ளார். நூற்றுக்கும் மேற்பட்ட இலக்கியச் சொற்பொழிவுகளையும் நிகழ்த்தியுள்ளார்.

ஏழு சர்வதேசக் கருத்தரங்குகளையும், பதினைந்துக்கும் மேற்பட்ட தேசியக் கருத்தரங்குகளையும் பயிலரங்குகளையும் ஒருங்கிணைத்துள்ளார்.

இலக்கிய வாழ்க்கை

இஸ்லாமிய இறையியல் கல்வியும் அரபு இலக்கியமும் பயிலும் காலக்கட்டத்தில் அரபு இலக்கியத்தில் ஆர்வம் கொண்ட ஜாகிர் ஹுசைன், அப்துல் ரகுமான், பேராசிரியர் தி.மு. அப்துல் காதர் உள்ளிட்ட தமிழ் அறிஞர்களுடன் ஏற்பட்ட நெருக்கத்தால் தமிழ் இலக்கியத்தில் ஈடுபடத் துவங்கினார்.

மாணவப் பருவத்தில் மாணவர்களால் நடத்தப்பட்டு வந்த கையேட்டு இதழ்களில் கட்டுரைகளையும், கவிதைகளையும் எழுதத் தொடங்கினார். 2005-ம் ஆண்டு முதல் இவரது கட்டுரைகள், அரபு மொழியிலிருந்து நேரடியாக தமிழில் மொழியாக்கம் செய்யப்பட்ட கவிதைகள் மற்றும் சிறுகதைகள் ஆனந்த விகடன், காலச்சுவடு, உயிர்எழுத்து, உயிர்மை, கணையாழி, நீலம், திணை, மணல் வீடு, சமரசம் உள்ளிட்ட இதழ்களில் வெளியாகின.

ஆனந்த விகடன், குங்குமம், கல்கி, இந்து தமிழ் காமதேனு, தினமணி, தினத்தந்தி, தினகரன், தினமலர், இந்து தமிழ் திசை, தி ஹிந்து, இந்தியன் எக்ஸ்பிரஸ், டைம்ஸ் ஆஃப் இந்தியா உள்ளிட்ட இதழ்களிலும் பல்வேறு தொலைக்காட்சி மற்றும் இணைய சேனல்களிலும் இவரது நூல் அறிமுகங்கள் மற்றும் நேர்காணல்கள் இடம்பெற்றுள்ளன.

உலக நாடுகளில் அரபு மொழியில் திருக்குறள் அறிமுகம்

திருக்குறள் அரங்கேற்றம் - சவூதி அரேபியா (2015)

சவூதி அரேபியா, துபாய், ஷார்ஜா, மஸ்கட், குவைத், மலேசியா, சிங்கப்பூர் உள்ளிட்ட நாடுகளில் அரபு மொழிபெயர்ப்பின் மூலம் திருக்குறளைப் பற்றி அறிமுக உரைகள் நிகழ்த்தியுள்ளார்

மார்ச் 28, 2015 முதல் ஏப்ரல் 5, 2015 வரை சவூதி அரேபியாவில் நடைபெற்ற சர்வதேச அரபுக் கவிஞர்கள் மாநாட்டில் திருக்குறளை அரபுக் கவிஞர்களுக்கு அறிமுகம் செய்தார். இதன் மூலம் சவூதி அரேபியாவில் அறிமுகம் செய்யப்பட்ட முதல் இந்திய இலக்கியமாக திருக்குறள் குறிப்பிடப்படுகிறது.

இலக்கியப் படைப்புகள்

மொழியாக்க நூல்கள்

தமிழ்த்தாய் வாழ்த்து இசைக் காணொளி வெளியீடு (2022)

ஜாகிர் ஹுசைன் தமிழில் வெளிவராத பல முக்கிய அரபு எழுத்தாளர்களின் படைப்புகளை நேரடியாக அரபு மொழியிலிலிருந்து தமிழுக்கு மொழியாக்கம் செய்துள்ளார். பல நூல்களை தமிழிலிருந்து அரபு மொழிக்கும் மொழிபெயர்த்துள்ளார்.

தமிழிலிருந்து அரபு மொழியில்

• திருக்குறள், உலகத் தமிழாராய்ச்சி நிறுவனம் (2013)
• ஆத்திசூடி, உலகத் தமிழாராய்ச்சி நிறுவனம் (2015), கேலக்ஸி பதிப்பகம் (2023)
• ஈரோடு தமிழன்பன் கவிதைகள், லிபி பதிப்பகம் (2021)
• ஆத்திசூடி புதிய பதிப்பு, கேலக்ஸி பதிப்பகம் (2021)
• பாரதியார் கவிதைகள், கேலக்ஸி பதிப்பகம் (2022)
• பாரதிதாசன் கவிதைகள், தமிழ்நாடு அரசின் நிதிநல்கையுடன் கஸல் பதிப்பகம் (2024)

துபாயில் நடைபெற்ற பாரதியார் கவிதைகள் அரபு மொழியாக்கம் வெளியீடு (2022)

அரபியிலிருந்து தமிழில்

• 'கவிதையை நம்பாதே' - மஹ்மூத் தரவீஷ் கவிதைகள், கீற்று வெளியீட்டகம், 2007
• 'கவலைப்படாதே', ஐ.எப்.டி. பதிப்பகம், 2010
• நிசார் கப்பானி கவிதைகள், சூஃபி பதிப்பகம், 2020
• 'கிறுக்கி' - அரபு சிறுகதைத் தொகுப்பு, காலச்சுவடு பதிப்பகம், 2021
• 'உப்பு' - கவிதைத் தொகுப்பு, டிஸ்கவரி பதிப்பகம், 2022
• 'நாடோடிக் கட்டில்' - கவிதைத் தொகுப்பு, காலச்சுவடு பதிப்பகம், 2023
• 'காதலர்களாகப் பிரிவோம்' - கவிதைத் தொகுப்பு, உயிர்மை பதிப்பகம், 2023
• 'புயல் முட்டை' - அரபு நுண்கதைத் தொகுப்பு, எதிர் வெளியீடு, 2024

பாடநூல்கள்

• ஆசிரியர், தமிழ்நாடு அரசின் 9 மற்றும் 10ஆம் வகுப்பு அரபு பாடநூல்கள் (2012)
• மதிப்புரையாளர், தமிழ்நாடு அரசின் 11 மற்றும் 12ஆம் வகுப்பு அரபு பாடநூல்கள்
• தமிழ்நாடு அரசின் 11 மற்றும் 12-ம் வகுப்பு அரபு பாடநூல்களில் திருக்குறள் அரபு மொழியாக்க அறிமுகம்
• வல்லுநர் குழு உறுப்பினர், கேரள அரசின் 2, 4, 6, 11 மற்றும் 12ஆம் வகுப்பு அரபு பாடநூல்கள்

சமய நூல்கள்

அமீரக கவிஞர்களுடன் ஜாகீர் ஹுசைன் (2021)

ஜாகிர் ஹுசைன் நபிகளாரின் இஸ்லாமிய பொன்மொழிகளையும் திருக்குர்ஆன் விரிவுரையையும் தமிழில் வெளியிட்டு வரும் சென்னை ரஹ்மத் அறக்கட்டளையில் 11 ஆண்டுகள் பகுதிநேர மொழிபெயர்ப்பாளராக பணியாற்றினார். அங்கு மொழிபெயர்ப்பாளர் குழுவுடன் இணைந்து 'ஸஹீஹ் முஸ்லிம் - நபிகளாரின் பொன்மொழிகள்' முதல் மூன்று பாகங்களையும் 'தஃப்சீர் இப்னு கஸீர் - திருக்குர்ஆன் விளக்கவுரை' முதல் மூன்று பாகங்களையும் மொழியாக்கம் செய்தார். நபிகளாரின் போதனைகளை அடிப்படையாகக்கொண்ட 'அன்பின் மொழி' என்ற இவரது நூல் அறம் பதிப்பகம் சார்பில் 2012-ம் ஆண்டு வெளியானது.

நாடகம், திரைப்படம், இசை

• பிப்ரவரி 28, 2015-ல் இந்தியாவில் முதன்முறையாக அரபு நாடகவிழாவை சென்னையில் நடத்தினார். அரபு நாடக ஆசிரியர் தவ்பீகுல் ஹக்கீம் எழுதிய 'கழுதைச்சந்தை' நாடகத்தை தமிழில் மொழிபெயர்த்து அரங்கேற்றினார்.
• பிப்ரவரி 2, 2017-ல் தேசிய அளவிலான அரபு இசைப் போட்டியை சென்னைப் பல்கலைக்கழகத்தில் நடத்தினார்.
• ஆகஸ்டு 11, 2018-ல் சூஃபி இசை விழாவை சென்னையில் நடத்தினார்.
• விஸ்வரூபம்-1, விஸ்வரூபம்-2, செக்கச்சிவந்த வானம் ஆகிய படங்களுக்கு அரபு வசனங்களை வடிவமைத்துக் கொடுத்திருக்கிறார்.

தமிழ்நாடு அரசின் சிறந்த மொழிபெயர்ப்பாளர் விருது 2016

விருதுகள்

• இஸ்லாமிய இலக்கியக் கழகத்தின் 'சிறந்த மொழிபெயர்ப்பாளர் விருது', 2007
• தமிழ்நாடு சமூக நல அமைப்பு, தம்மா, சவூதி அரேபியாவின் சவூதி வாழ் இந்தியருக்கான 'சமூக சேவை விருது', 2015
• தமிழ்நாடு ஜமாஅத்துல் உலமா இமாம்கள் பேரவையின் அரபுமொழி சேவைக்கான விருது, 2016
• தமிழ்நாடு அரசின் 'சிறந்த மொழிபெயர்ப்பாளர் விருது', 2016
• சென்னை கம்பன் கழகத்தின் 'சீறாப்புராணம் பரிசில் விருது', 2017
• மஸ்கட் தமிழ்ச் சங்கத்தின் 'குறள் செல்வன்" விருது', 2019
• குவைத் பொங்குத் தமிழ் மன்றத்தின் 'குறட் தூதர்' விருது, 2019
• குவைத் பெரியார் நூலகத்தின் 'குறளொளிச் சுடர்' விருது, 2019
• குராம்பேட்டை திருக்குறள் பேரவையின் 'திருக்குறள் அறம்' விருது, 2020
• வி.ஜி.பி. இலக்கிய விருது, 2023
• சென்னைப் பல்கலைகழகத்தின் 'சிறந்த ஆய்வாளர் விருது', 2023

அடிக்குறிப்புகள்

வெளி இணைப்புகள்

• மொழிபெயர்ப்பாளர் அ. ஜாகிர் ஹுசைன் - காலச்சுவடு
• கிறுக்கி - இஹ்சான் அப்துல் குத்தாஸ்- அரபியிலிருந்து தமிழில் அ.ஜாகிர் ஹுசைன் - சரவணமாணிக்கவாசகம் வலைப்பூ
• தமிழக முதலமைச்சர் வெளியிட்ட அரபு மொழி திருக்குறள் சிடி - இந்தியன் எக்ஸ்பிரஸ்
• அரபு மொழியில் பாரதிதாசன் கவிதைகள் நூல் - தினமணி
• அரபு மொழி பேசப்போகும் 'பாவேந்தர்' பாரதிதாசனின் சிந்தனைகள்! - அமேசிங் தமிழ்நாடு
• சவுதி மக்கள் கொண்டாடும் திருக்குறளின் ஞானம் - தி ஹிந்து
• பாரதியார் கவிதைகள் அரபு மொழிபெயர்ப்பு அமீரக அரசு செயலாளர் துபாயில் வெளியிட்டார் - நம்பிக்கை செய்திகள்
• பாரதியார் கவிதைகள் அரபு மொழியில் - தி ஹிந்து
• அரபி மொழியில்... திருக்குறள் பாடும் பேராசிரியர்..! - தமிழ் மித்ரன்
• ஆத்திசூடி தமிழ்-அரபு இசையொளி ஆல்பம் வெளியீடு - தினமணி
• பாரதியார் பாடல் வீடியோ அரபு மொழியில் வெளியீடு - தினமலர்

‎

---

✅Finalised Page

முதலில் வெளியிடப்பட்ட தேதி: 08-Nov-2024, 17:39:17 IST