ம.பொ. சிவஞானம்
- சிவஞானம் என்ற பெயரில் உள்ள மற்ற பக்கங்களைப் பார்க்க: சிவஞானம் (பெயர் பட்டியல்)
ம.பொ. சிவஞானம் (மயிலாப்பூர் பொன்னுசாமி சிவஞானம்) (ஜூன் 26, 1906 - அக்டோபர் 3, 1995) தமிழறிஞர், பேச்சாளர், அரசியல் களச்செயல்பாட்டாளர். இந்திய சுதந்திரப் போராட்டத்தில் பங்கேற்றார். சிலப்பதிகாரத்தில் கொண்ட ஈடுபாட்டின் காரணமாக சிலம்புச் செல்வர் என அழைக்கப்பட்டார். தமிழ்ப்பண்பாட்டின் தனியடையாளத்தை, தனித்துவத்தைக் கண்டடைந்து முன்வைத்த தமிழியக்கவாதி. அதை இந்தியதேசியத்தின் ஒருபகுதியாக 'ஒருமைப்பாடு' என்னும் தரிசனமாக முன்வைத்தார். தமிழரசுக் கழகம் என்னும் அரசியல் அமைப்பை நிறுவி நடத்தினார். தமிழக எல்லை மீட்புப் போராட்டங்களில் ஈடுபட்டார்.
பிறப்பு, கல்வி
ம.பொ. சிவஞானம், சென்னை ஆயிரம் விளக்குப் பகுதியில் உள்ள சால்வன்குப்பம் என்ற இடத்தில் மயிலாப்பூர் பொன்னுசாமி, சிவகாமி இணையருக்கு ஜூன் 26, 1906-ல் பிறந்தார். ம.பொ.சி பிறந்தபோது குடும்பத்தினர் கேட்டுக்கொண்டதனால், சரபைய செட்டி என்ற தேவாங்கர் வகுப்பைச் சேர்ந்த சோதிட முதியவர் இவருக்கு ஞானப்பிரகாசம் என்று பெயர் சூட்டினார். ஆனால் அந்தச் சோதிடர் இவரை 'சிவஞானி' என்றே அழைத்தார். பிற்காலத்தில் சிவஞானம் என்ற பெயரே நிலைத்தது. வறுமையால் பள்ளிப்படிப்பு இடை நின்றது. மூன்றாம் வகுப்பு வரை மட்டுமே பள்ளிக்கல்வி பெற்றார்.
தனி வாழ்க்கை
ம.பொ. சிவஞானம் எட்டு ஆண்டுகள் நெசவுத் தொழிலில் ஈடுபட்டார். 1927-ல் சேலம் பி. வரதராஜுலு நாயுடு சென்னையில் இருந்து நடத்திய 'தமிழ்நாடு ' நாளிதழில் அச்சு கோப்பாளராக வேலைக்குச் சேர்ந்தார். பின்னர் அரசியல்வாதியாகவும், இதழாளராகவும், சொற்பொழிவாளராகவும் வாழ்ந்தார்.
ம.பொ.சி தன் முப்பத்தியொன்றாம் வயதில் ராஜேஸ்வரியை மணந்தார். இவர்களுக்குத் மகன் திருநாவுக்கரசு. மகள்கள் கண்ணகி, மாதவி. ம.பொ.சியின் மகன் வழி பேத்தி தி. பரமேசுவரி தமிழ் எழுத்தாளர்.
அரசியல் வாழ்க்கை
ம.பொ.சியின் அரசியல் வாழ்க்கை மூன்று நிலைகள் கொண்டது. அவர் காங்கிரஸ் ஆதரவாளராக தன் அரசியல்வாழ்க்கையை தொடங்கினார். பின்னர் தமிழரசு கழகம் வழியாக எல்லைமீட்புப் போராட்டங்களில் ஈடுபட்டார். அதன்பின் கூட்டணி அரசியலில் பங்குகொண்டு அரசுப்பதவிகளை வகித்தார். அரசியல் விமர்சகராகவும் பேச்சாளராகவும் திகழ்ந்தார்.
காங்கிரஸ் காலகட்டம்
ம.பொ.சி தமிழ்நாடு இதழ் வழியாக அரசியல் அறிமுகம் பெற்றார். காங்கிரஸ் தலைவராக இருந்த சேலம் பி.வரதராஜுலு நாயுடு நடத்திய அந்த இதழின் ஆசிரியராக டி.எஸ்.சொக்கலிங்கம் இருந்தார். 1936 முதல் பத்தாண்டுகள் காங்கிரஸ் கட்சியில் செயல்பட்டார். காங்கிரஸில் ம.பொ.சி, சி. ராஜகோபாலாச்சாரி ஆதரவாளராக நீடித்தார்.
தமிழரசு கழகம்
ம.பொ.சி. 1945-ல் "தமிழ்முரசு" என்னும் மாத இதழைத் தொடங்கினார். ஒன்றரை ஆண்டுக்காலம் அவ்விதழ் மூலம் "புதிய தமிழகம்" எனும் தனது கருத்தாக்கத்தை ம.பொ.சி. பரப்புரை செய்தார்.
சுதந்திர இந்தியாவில், சுதந்திர தமிழரசு அமைந்தே தீரவேண்டும்; தமிழ் வளர, தமிழர் வாழ, தமிழ்நாடு செழிக்கத் தமிழரசு வேண்டும்; அத்தகைய சுதந்திர அரசியலை நிர்ணயிக்கும் சுயநிர்ணய உரிமை தமிழருக்கு உண்டு போன்ற பரப்புரைகள் செய்தார். 'தமிழ்நாட்டைத் தாய்நாடாகவும், தமிழ் மொழியைத் தாய்மொழியாகவும் கொண்டு வாழும் தமிழ்நாட்டின் நிரந்தரக் குடிகள் அனைவரும் தமிழராகக் கொள்ளப்படுவர். தமிழர் எங்கெல்லாம் பெருவாரியாக வசிக்கிறார்களோ அந்தத் தொடர்ச்சியான பிரதேசங்கள் தமிழ்நாடாகக் கொள்ளப்படும்' என்றும், தமிழர் தனித்தேசிய இனம், தமிழ்நாடு தமிழர்களின் தாயகம் என்றும் கூறி 1946-ல், தமிழ்த்தேச விடுதலைப் போராட்டத்தைத் தொடங்கி வைத்தார்.
மொழிவழியாக உருவாகும் தமிழ்நாட்டோடு சேர்க்கப்பட வேண்டிய பகுதிகளாக திருவிதாங்கூர் அரசில் இருந்த தமிழர் மிகுதியாக வாழ்ந்து வந்த தென்பகுதி வட்டங்கள்; கோலார் தங்கவயல் பகுதி; பாண்டிச்சேரி - காரைக்கால்; சித்தூர் மாவட்டத் தமிழ்ப் பகுதிகள்; புதுக்கோட்டை மன்னராட்சிப் பகுதி; தமிழீழத்தின் யாழ்ப்பாணப் பகுதி ஆகியவற்றை முன்வைத்தார். இதற்காக தமிழரசுக் கழகம் என்ற இயக்கத்தை நவம்பர் 21, 1946-ல் தொடங்கினார்.
பிரித்தானிய மந்திரி சபையின் திட்டத்தின்படி தமிழ்நாடு 'ஏ' பிரிவில் சேர்க்கப்பட்டதால் ஏற்படும் கேடுகளையும் எடுத்துக்காட்டினார். ஆகஸ்ட் 8, 1954-ல், ம.பொ.சி. காங்கிரசிலிருந்து விலகினார். செப்டம்பர் 14, 2022 அன்று இந்த கட்சியின் அங்கீகாரம் இந்திய தேர்தல் ஆணையத்தால் ரத்து செய்யப்பட்டது.
எல்லை மீட்புப் போராட்டங்கள்
- மெட்ராஸ் ஸ்டேட் என்பதை மாற்றித் 'தமிழ்நாடு' என்ற பெயரை முன்மொழிந்தார்.
- 'மதராஸ் மனதே' என்று ஆந்திர மக்களின் போராட்டத்திற்கு எதிராக தமிழகத் தலைநகராகச் சென்னையை முன்னிறுத்தி வெற்றி பெற்றார்.
- திருப்பதியை தமிழகத்துடன் இணைக்கப் போராடினார். அதில் வெற்றி கிடைக்கவில்லை. ஆனால் அப்போராட்டத்தால் திருத்தணி தமிழகத்துக்குக் கிடைத்தது.
- குமரி மாவட்டம், செங்கோட்டை, பீர்மேடு, தேவிக்குளம் போன்றவை தமிழகத்துக்குக் கிடைக்கப் போராடினார். குமரியும் செங்கோட்டையும் தமிழகத்துக்குக் கிடைத்த போதும் பீர்மேடு, தேவிக்குளம் கேரளத்துடன் இணைக்கப்பட்டன.
அரசியல் விமர்சகர்
எம்.ஜி.ஆரின் நல்லெண்ணத்துக்குப் பாத்திரமானவராக, மேல்சபைத் தலைவராக இருந்தார்.
இலக்கிய வாழ்க்கை
ம.பொ. சிவஞானம், சிறுவயதில் தன் தாய் சொன்ன புராணக் கதைகள் மற்றும் நீதிக் கதைகள்தான் தன்னை சிந்தனையாளராக மாற்றியதாக குறிப்பிடுகிறார். சொந்த முயற்சியால் படித்து தமிழ் இலக்கண, இலக்கியங்களில் தேர்ச்சி பெற்றார். ஆங்கில அறிவையும் வளர்த்துக்கொண்டார்.
ம.பொ.சி பாரதியின் எழுத்துகள் மூலம் சங்க இலக்கியங்களின் அறிமுகம் பெற்றார். சிறையில் இருந்தபோது சிலப்பதிகாரம் கற்றார். தான் ஆரம்பித்த தமிழரசு கழகம் மூலம் 1950இல் முதன்முதலாகச் சிலப்பதிகார மாநாட்டை ஒருங்கிணைத்தார். பின் சிலப்பதிகார விழாவை ஆண்டுதோறும் நடத்த வழிவகை செய்தார். வீரபாண்டிய கட்டபொம்மன், வ.உ.சிதம்பரனார் ஆகியோரின் வாழ்க்கை வரலாற்றை விளக்கி நூல்கள் எழுதினார். இந்நூலைகளைத் தழுவி பி.ஆர். பந்துலு திரைப்படங்களை இயக்கினார். 1966இல் ம.பொ.சியின் 'வள்ளலார் கண்ட ஒருமைப்பாடு' என்னும் நூலுக்கு சாகித்ய அகாதெமி விருது வழங்கப்பட்டது.
இலக்கிய இடம்
ம.பொ.சியின் இலக்கியப் பங்களிப்பு இரண்டு தளங்களில் ஆனது.
முதலாவதாக தமிழிலக்கியத்தின் பொதுக்கூறுகளை அடையாளம் கண்டு மக்களிடம் பண்பாட்டு மாற்றங்களை உருவாக்க முயன்ற அறிவியக்கத்தின் குரலாக இருந்தார். சிலப்பதிகாரம் பற்றிய ம.பொ.சி அவர்களின் அத்தனை நூல்களிலும் சிலம்பில் இருந்து தமிழ்ப்பண்பாட்டுக்கூறுகளைக் கண்டடைந்து தொகுக்கும்போக்கு இருப்பதைக் காணலாம். சிலம்பில் இருந்து கண்டடைந்த பண்பாட்டுக்கூறுகளை சமகாலத்தில் வலியுறுத்தவும் சமகாலத்தின் பண்பாட்டு அம்சங்களை சிலம்பில் கண்டடையவும் செய்தார்.
இரண்டாவதாக இந்தியதேசியம் என்ற ஒருமைக்குள் வட்டாரதேசியத்தை அதன் தனித்தன்மையும் முழுமையும் கெடாமல் வளர்த்தெடுக்கும் நோக்கு. அதற்காக அவர் இளங்கோவை பழந்தமிழின் முகமாகவும் பாரதியை நவீனகாலகட்டத்தின் புதியகருத்துக்களின் அடையாளமாகவும் முன்னிறுத்தினார்.
ம.பொ.சியின் உரைநடை மேடைப்பேச்சுக்குரிய சொல்மிகையும் பொருள்மிகையும் கொண்டது.
மறைவு
ம.பொ. சிவஞானம் உடல்நலம் குன்றி அக்டோபர் 3,1995 அன்று தனது 89-ஆவது வயதில் காலமானார்.
விருதுகள்
- சிலம்புச் செல்வர் விருது - ரா.பி. சேதுப்பிள்ளை அளித்தார்.
- டாக்டர் பட்டம் - சென்னை பல்கலைகழகம், அண்ணாமலைப் பல்கலைக் கழகம்
- பேரவைச் செல்வர் பட்டம் - மதுரைப் பல்கலைக் கழகம்
- இந்திய அரசின் பத்மஸ்ரீ விருது
- சாகித்ய அகாதெமி விருது - 1966
நூல் பட்டியல்
2006-இல் ம.பொ.சியின் நூற்றாண்டு விழாவினை முன்னிட்டு தமிழக அரசு அவரது நூல்களை நாட்டுடைமையாக்கியது.
இவரைப் பற்றிய நூல்கள்
- சிலம்புச் செல்வர் ம.பொ.சி.யுடன்... (மு. மாரியப்பன், சர்வோதய இலக்கியப் பண்ணை)
- அறிஞர்கள் பார்வையில் ம.பொ.சி. (ம.பொ.சி.மாதவி பாஸ்கரன்)
பாரதி
- வள்ளலாரும் பாரதியும் [1965]
- எங்கள் கவி பாரதி [1953]
- பாரதியாரும் ஆங்கிலமும் [1961]
- பாரதி கண்ட ஒருமைப்பாடு [1962]
- உலக மகாகவி பாரதி [1966]
- பாரதியார் பாதையிலே [1974]
- பாரதியின் போர்க்குரல் [1979]
- பாரதியார் பற்றிய ம.பொ.சி. பேருரை [1983]
- என்னை வளர்த்த பாரதி[2013] (ம.பொ.சி. கூறி விக்கிரமன் (எழுத்தாளர்), நாகராஜன் தொகுத்தது)
சிலப்பதிகாரம்
- சிலப்பதிகாரமும் தமிழரும் [1947]
- கண்ணகி வழிபாடு [1950]
- இளங்கோவின் சிலம்பு [1953]
- வீரக்கண்ணகி [1958]
- நெஞ்சையள்ளும் சிலப்பதிகாரம் (உரை) [1961]
- மாதவியின் மாண்பு [1968]
- கோவலன் குற்றவாளியா? [1971]
- சிலப்பதிகாரத் திறனாய்வு [1973]
- சிலப்பதிகார யாத்திரை [1977]
- சிலப்பதிகார ஆய்வுரை [1979]
- சிலப்பதிகார உரையாசிரியர்கள் சிறப்பு [1980]
- சிலப்பதிகாரத்தில் யாழும் இசையும் [1990]
- சிலம்பில் ஈடுபட்டதெப்படி? [1994]
இராமலிங்க அடிகள்
- வள்ளலார் கண்ட ஒருமைப்பாடு [1963]
- வள்ளலாரும் பாரதியும் [1965]
- வள்ளலார் வளர்த்த தமிழ் [1966]
- வள்ளலார் வகுத்த வழி [1970]
- வள்ளலார் கண்ட சாகாக் கலை [1970]
- வானொலியில் வள்ளலார் [1976]
- வள்ளலாரும் காந்தியடிகளும் [1977]
- வள்ளலார் கண்ட ஒருமைப்பாடு (பள்ளிப் பதிப்பு) [1963]
வ.உ. சிதம்பரனார்
- கப்பலோட்டிய தமிழன் [1944]
- தளபதி சிதம்பரனார் [1950]
- கப்பலோட்டிய சிதம்பரனார் (விரிவான பதிப்பு) [1972]
கட்டபொம்மன்
- வீரபாண்டிய கட்டபொம்மன் [1949]
- கயத்தாற்றில் கட்டபொம்மன் [1950]
- சுதந்திர வீரன் கட்டபொம்மன் [1950]
திருவள்ளுவர்
- வள்ளுவர் வகுத்த வழி [1952]
- திருவள்ளுவரும் காரல் மார்க்சும் [1960]
- திருக்குறளில் கலை பற்றிக் கூறாததேன்? [1974]
ஆங்கில நூல்கள்
- The Great Patriot V.O. Chidambaram Pillai
- The First Patriot Veera Pandia Katta Bomman
- The Universal Vision of Saint Ramalinga
உசாத்துணை
- ம.பொ.சி பற்றிய இணைய தளம்
- எனது போராட்டம் 1 & 2, ம.பொ.சி தன்வரலாறு நூல்
- ம.பொ.சிவஞானம் 10 - தமிழ் ஹிந்து நாளிதழ்.
இணைப்புகள்
- தலைவர் மபொசி இணையநூலகம்
- மபொசி கண்ட ஒருமைப்பாடு - ஜெயமோகன்.இன்
- ம.பொ.சி - தி.பரமேஸ்வரி, ஜெயமோகன் கடிதம்
✅Finalised Page
முதலில் வெளியிடப்பட்ட தேதி:
03-Jan-2023, 10:31:47 IST
