சுவேதாரண்யேஸ்வரர் கோயில்

சுவேதாரண்யேஸ்வரர் கோயில்

சுவேதாரண்யேஸ்வரர் கோயில்

சுவேதாரண்யேஸ்வரர் கோயில் திருவெண்காட்டில் அமைந்த தேவாரப் பாடல் பெற்ற தலம். இந்துசமய அறநிலையத்துறையின் கட்டுப்பாட்டில் உள்ளது. சிவபெருமான் சிதம்பரத்தில் நடனம் ஆடுவதற்கு முன்பு இங்கு நடனமாடியதாக நம்பப்படுவதால் இந்த கோயில் 'ஆதி சிதம்பரம்' என்று அழைக்கப்படுகிறது.

இடம்

மயிலாடுதுறையிலிருந்து தரங்கம்பாடி செல்லும் வழித்தடத்தில் (மங்கைமடம் வழியாக) 23 கிலோமீட்டர் தொலைவில் திருவெண்காடு அமைந்துள்ளது. சீர்காழியிலிருந்து பூம்புகார் வழியாக 13 கிலோமீட்டர் தொலைவில் இத்தலம் உள்ளது.

பெயர்க்காரணம்

சமஸ்கிருதத்தில் திருவெண்காட்டின் பெயர் 'ஸ்வேதாரண்யம்'. 'ஸ்வேத' என்றால் வெள்ளை 'ஆரண்யம்' என்றால் காடு என்பதால் இந்த இடம் 'திருவெண்காடு' என்று அழைக்கப்படுகிறது. இங்குள்ள இறைவன் ஸ்வேதாரண்யேஸ்வரர், திருவெண்காடர், திருவெண்காட்டுத் தேவர், திருவெண்காடையார், திருவெண்காட்டுப் பெருமான் என்று அழைக்கப்படுகிறார்.

வரலாறு

சுவேதாரண்யேஸ்வரர் கோயில் வால்மீகி ராமாயணத்திலும் சிலப்பதிகாரத்திலும் குறிப்பிடப்பட்டுள்ளது.

கல்வெட்டு

சோழ மன்னர்களான ஆதித்யன், இராஜராஜன், இராஜேந்திரன், குலோத்துங்கன், விக்கிரம சோழன் மற்றும் ராஜாதிராஜன் ஆகியோரின் காலத்துடன் தொடர்புடைய கல்வெட்டுகள் இங்கு உள்ளன. சில கல்வெட்டுகள் பாண்டிய மன்னர்களான குலசேகர பாண்டியன், விக்ரம பாண்டியன், சுந்தர பாண்டியன் மற்றும் பராக்கிரம பாண்டியன் பற்றியவை. விஜயநகர வம்சத்தைச் சேர்ந்த சில கல்வெட்டுகளும் உள்ளன.

சுவேதாரண்யேஸ்வரர் கோயில்

தொன்மம்

• புதன் இங்கு தவம் செய்து தனது அலி தோஷத்தில் இருந்து விடுபட்டதாக நம்பப்படுகிறது.
• புதன் இங்குள்ள இறைவனை வணங்கி நவகிரகங்களில் ஒன்றாக இடம் பெற்றார். புதனுக்குக் காணிக்கையாக பச்சை நிற வஸ்திரம் கொடுப்பது இங்கு வழக்கம்.
• இந்திரன், ஐராவதம், மகாவிஷ்ணு, சூரியன், சந்திரன், அக்னி ஆகியோர் இங்கு சிவனை வழிபட்டதாகவும் நம்பப்படுகிறது.
• பட்டினத்தாருக்கு சிவபெருமானே இங்கு சிவ தீட்சை வழங்கியதாக நம்பப்படுகிறது.

பிரம்மன்

பிரணவ மந்திரத்தின் (ஓம்) அர்த்தத்தை விளக்க முடியாததால் முருகன் பிரம்மாவை சிறையில் அடைத்ததாக தொன்மக்கதைகள் கூறுகின்றன. சிவபெருமான் தானே முருகப்பெருமானிடம் சென்று பிரம்மன் சிறைபிடிக்கப்பட்டதால் நிறுத்தி வைக்கப்பட்டிருந்த படைப்புத் தொழிலின் முக்கியத்துவத்தை விளக்கினார். பிரம்மா விடுவிக்கப்பட்டார். சிறையில் இருந்ததால் பிரம்மதேவன் பிரம்மஞானத்தை மறந்தார்.

பிரம்மதேவன் இத்தலத்திற்கு வந்து தனது நினைவாற்றலை மீட்டெடுக்க கடுமையான தவம் செய்ததாக நம்பப்படுகிறது. இங்கு அவர் கடைப்பிடித்த தவம் 'சமது நிலை' (மூச்சைப் பிடித்துக் கொண்டு) என்று அழைக்கப்படுகிறது. அவரது தவத்தால் மகிழ்ந்த சிவபெருமான், தட்சிணாமூர்த்தியின் வடிவில், அவருக்கு மீண்டும் பிரம்மஞானம் கற்பித்தார். மேலும், பார்வதி தேவி அவருக்கு பிரம்ம கலை கற்பித்ததாக நம்பப்படுகிறது. எனவே, இங்குள்ள பார்வதி தேவி 'ஸ்ரீ பிரம்ம வித்யாம்பிகை' என்று அழைக்கப்படுகிறார். இங்கு 'பிரம்ம சமது' என்ற பெயரில் தனி சன்னதி உள்ளது.

பகவான் அகோரமூர்த்தி

புராணங்களின்படி சிவபெருமானுக்கு ஈசானம், தத்புருஷம், அகோரம், வாமதேவம் மற்றும் சத்யோஜாதம் ஆகிய ஐந்து முகங்கள் உள்ளன. ஒவ்வொன்றும் சிவபெருமானின் ஒரு திசையையும் ஒரு அம்சத்தையும் குறிக்கின்றன. ஈசானம் வானத்தை நோக்கியவாறு தூய்மையைக் குறிக்கும்; வாமதேவம் வடக்கு நோக்கியவாறு வாழ்வாதாரத்தைக் குறிக்கிறது; தத்புருஷர் கிழக்கு நோக்கி, அகங்காரத்தை அழித்த ஆன்மீகத்தை பிரதிபலிக்கிறார்; அகோரம் தெற்கு நோக்கி இறைவனின் அழிவு மற்றும் மறுபிறப்பு அம்சத்தை குறிக்கிறது; சத்யோஜாதம் மேற்கு நோக்கி நின்று படைப்பைக் குறிக்கிறது.

இக்கோயிலுடன் தொடர்புடைய மற்றொரு புராணக்கதை, சலந்திரன் என்ற அரக்கனின் மகன் மருதுவன் என்ற அரக்கனின் புராணம். மருதுவான் என்னும் சிவபெருமானின் தீவிர பக்தன் கடுமையான தவம் செய்து திரிசூலத்தால் ஆசிர்வதிக்கப்பட்டான். இந்த வரம் பெற்ற பிறகுதேவர்களை பயமுறுத்தத் தொடங்கினான். தேவர்களின் வேண்டுகோளுக்கு இணங்க, சிவபெருமான் நந்தியை மருதுவானை தண்டிக்க அறிவுறுத்தினார். அப்போது ஏற்பட்ட சண்டையில் மருதுவான் நந்தியை திரிசூலத்தால் 9 இடங்களில் தாக்கினான். இதையறிந்த சிவபெருமான் அகோரமூர்த்தி அவதாரம் எடுத்து அரக்கனை வென்றார். இந்த மூர்த்தி சிவபெருமானின் உக்கிர அவதாரம். இது அவரது ஐந்து முகங்களில் அகோரம் என்ற முகத்தைக் குறிக்கிறது. இங்குள்ள மரத்தடியில் அகோரமூர்த்தி அசுரனைக் கொன்றதாக ஐதீகம். இந்த மரத்தை இன்றும் கோயிலில் காணலாம். இறைவன் முன் இருக்கும் நந்தி சிலை உடலில் 9 தழும்புகளுடன் காணப்படுகிறது.

சிவபெருமான் அசுரனை அழித்தது ஒரு பூரம் நட்சத்திர நாளான ஞாயிற்றுக்கிழமை என்ற நம்பிக்கையால் இந்நாட்களில் சிறப்பு பூஜைகள் நடைபெறுகின்றன. சிவபெருமான் 64 வடிவங்களை எடுத்ததாக நம்பப்படுகிறது, மேலும் இந்த அகோரமூர்த்தி சிவனின் 43-வது வடிவம். இக்கோயிலில் மட்டுமே இறைவனின் இந்த வடிவத்தை நாம் தரிசிக்க முடியும்.

அம்மன் பிள்ளை இடுக்கி அம்பாள்

மாடவீதியில் பிள்ளை இடுக்கி அம்பாள் சன்னதி உள்ளது. திருஞான சம்பந்தர் இத்தலத்திற்கு வந்தபோது, ​​இந்த இடம் கைலாச மலை போலவும், மணல் திட்டுகள் சிவலிங்கம் போலவும் இருந்ததைக் கண்டார் என்று நம்பப்படுகிறது. அதனால் இந்த புண்ணிய பூமியில் காலடி எடுத்து வைக்க மனமில்லாமல் பார்வதி தேவியை 'அம்மையே' என்று அழைத்தார். அவரது குரலைக் கேட்ட பார்வதி தேவி அங்கு வந்து திருஞானசம்பந்தரைத் தூக்கிக் கொண்டு கோயிலுக்குச் சென்றார்.

அவர் அம்மனை அழைத்த இடம் 'கூப்பிட்டான் குளம்' என்றும் இந்த குளத்திற்கு அருகில் உள்ள விநாயகர் சிலை 'சம்பந்தர் விநாயகர்' என்றும் அழைக்கப்படுகிறது. இங்குள்ள அம்மனை வழிபடுவதன் மூலமும் தொட்டில் காணிக்கை செலுத்துவதன் மூலமும் குழந்தை வரம் பெறலாம் என பக்தர்கள் நம்புகிறார்கள்.

சுவேதகேது

யமன் வட இந்தியாவில் உள்ள ஜெயந்தன் என்ற மன்னனின் மகன் ஸ்வேதகேதுவின் உயிரைப் பறிக்க முயன்றதற்காக இங்குள்ள சிவபெருமானால் தண்டிக்கப்பட்டார். யமன் தனது பாவங்களைப் போக்க இங்கு சிவபெருமானை வேண்டினார்.

மெய்க்கண்டார்

நான்கு சந்தான குரவர்களில் முதன்மையானவரும், சிவஞானபோதம் எழுதியவருமான மெய்கண்டார் இக்கோயிலின் ஸ்வேதாரண்யேஸ்வரரின் அருளால் பிறந்ததாக நம்பப்படுகிறது. மெய்க்கண்டரின் இயற்பெயர் சுவேதவனப்பெருமாள். இங்குள்ள அக்னி தீர்த்தக் கரையில் அவரது சன்னதி உள்ளது.

ஆனந்த தாண்டவம்

சிவபெருமான் இங்கு ஆனந்த தாண்டவம், காளி தாண்டவம், கௌரி தாண்டவம், முனி தாண்டவம் நிறுத்தம், சந்தியா தாண்டவம், திரிபுர தாண்டவம், புஜங்க தாண்டவம், சம்ஹார தாண்டவம், பைஷாதான தாண்டவம் ஆகிய ஒன்பது தாண்டவங்கள் செய்ததாக நம்பப்படுகிறது.

பார்வதி தேவியின் விருப்பப்படி, சிவபெருமான் தனது ஆனந்த தாண்டவத்தை நிகழ்த்தியதாகவும் இந்த நடனம் ஆடும் போது, ​​அவரது மூன்று கண்களில் இருந்து விழுந்த நீர் துளிகள் இந்த கோவிலின் மூன்று தீர்த்தங்களை உருவாக்கியது எனவும் நம்பப்படுகிறது.

சுவேதாரண்யேஸ்வரர் கோயில் ஸ்தல விருட்சம்

கோயில் பற்றி

• மூலவர்: ஸ்வேதாரண்யேஸ்வரர், வெண்காட்டு நாதர்
• அம்பாள்: பிரம்ம வித்யாம்பிகை
• தீர்த்தம்: சூரிய, சந்திர, அக்னி தீர்த்தங்கள்
• ஸ்தல விருட்சம்: வடவாள், வில்வம், கொண்டை மரங்கள்
• பதிகம்: திருஞானசம்பந்தர், திருநாவுக்கரசர் மற்றும் சுந்தரமூர்த்தி
• சோழநாட்டில் காவிரி ஆற்றின் வடகரையில் உள்ள 276 தேவார பாடல் பெற்ற சிவஸ்தலங்களில் இதுவும் ஒன்று.
• இக்கோயிலில் உள்ள சிவபெருமான் சுயம்பு மூர்த்தியாக உள்ளார்.
• புதன் பரிகாரஸ்தலம்
• ஐம்பத்தியொரு சக்தி பீடங்களில் ஒன்று. பார்வதி தேவி இங்கு 'பிரணவ சக்தி' என்று அழைக்கப்படுகிறார்.
• காசிக்கு இணையானமுக்கியத்துவம் வாய்ந்ததாக கருதப்படும் காவிரி ஆற்றங்கரையில் உள்ள 6 சிவஸ்தலங்களில் இக்கோயிலும் ஒன்றாகும்.
• திருஞானசம்பந்தர், திருநாவுக்கரசர் மற்றும் சுந்தரமூர்த்தி ஆகியோர் தங்கள் பதிகங்களை வழங்கிய 44 பாடல் பெற்ற ஸ்தலங்களில் இதுவும் ஒன்று.
• கடைசியாக கும்பாபிஷேகம் ஏப்ரல் 11, 2016 அன்றும் அதற்கு முன்னதாக ஜூலை 11, 2007, ஜூலை 13, 1986 மற்றும் மார்ச் 26, 1961 ஆகிய தேதிகளிலும் நடைபெற்றது.

சுவேதாரண்யேஸ்வரர் கோயில்

கோயில் அமைப்பு

சுவேதாரண்யேஸ்வரர் கோயிலின் வளாகம் பன்னிரெண்டு ஏக்கர் பரப்பளவில் உள்ளது. இந்த கோவிலுக்கு அருகில் காவேரி, மணிகர்ணிகை ஆறுகள் ஓடுகின்றன. மணிகர்ணிகை நதியில் நீராடுவது காசியில் உள்ள 64 ஸ்நான ஸ்தலங்களில் நீராடுவதற்கு சமம் என்று நம்பப்படுகிறது. இந்த கோவிலில் ஐந்து நடைபாதைகளும் அதன் பிரதான கோபுரம் (ராஜகோபுரம்) ஐந்து அடுக்குகளும் உள்ளன. புதனுக்கு தனி சன்னதி உள்ளது. சந்திரனின் மகன் புதன். சந்திரன் சன்னதியும், சந்திர தீர்த்தமும் புத்தனின் சன்னதிக்கு எதிரே அமைந்துள்ளது.

சிதம்பரம் போன்று நடராஜர் சன்னதிக்கு அருகில் விஷ்ணு சன்னதி உள்ளது. சிதம்பரத்தைப் போலவே இங்கும் 'சிவ தாண்டவம்' விழா கொண்டாடப்படுகிறது. நடராஜர் சிலை மிகவும் அழகானது. இங்குள்ள நடராஜப் பெருமானுக்கு நடக்கும் பூஜைகளும், திருவிழாக்களும் சிதம்பரத்தில் நடைபெறுவது போலவே நடைபெறும். இங்கும் ஸ்படிக லிங்கம் மற்றும் சிதம்பர ரகசியம் ஆகியவற்றைக் காணலாம். ஸ்படிக லிங்கத்திற்கு, தினமும் நான்கு முறை அபிஷேகம் செய்யப்படுகிறது. நடராஜருக்கு ஒரு வருடத்தில் ஆறு அபிஷேகங்கள் மட்டுமே நடைபெறும்.

அகோரமூர்த்தி

சிற்பங்கள்

சிவன் மற்றும் பார்வதி தேவி சன்னதிகள் தவிர, விநாயகர், முருகன், வல்லப கணபதி, ஸ்வேத மகா காளி, பைரவர் ஆகியோரின் சன்னதிகள் மற்றும் சிலைகள் உள்ளன. ஸ்வேதவனப் பெருமாள், பஞ்ச லிங்கங்கள், நாகேஸ்வரர், வீரபத்ரர், சுஹாசன மூர்த்தி, இடும்பன், விசாலாக்ஷியுடன் விஸ்வநாதர், அங்காளபரமேஸ்வரி, கஜலட்சுமி, நால்வர், 63 நாயன்மார்கள் (இருவரும் கல் மற்றும் ஊர்வலச் சிலைகள்), சட்டநாதர் ஆகியோரின் சிலைகள் உள்ளன. சோலையப்ப முதலியார் தனது மந்திரி, பெரிய வாரணப் பிள்ளையார், தன விநாயகர், லட்சுமி, சரஸ்வதி ஆகியோருடன் மாடவீதிகளில் உள்ளன. கோஷ்டத்தில் நர்த்தன விநாயகர், மேதா தட்சிணாமூர்த்தி, மகாவிஷ்ணு, பிரம்மா மற்றும் துர்க்கை ஆகியோரின் சிலைகளைக் காணலாம்.

சிறப்புகள்

• மூன்று முக்கிய தெய்வங்கள் - ஸ்வேதாரண்யேஸ்வரர் (சுயம்பு லிங்கம்), நடராஜர், அகோர மூர்த்தி
• மூன்று தேவிகள் - பிரம்ம வித்யா நாயகி, காளி மற்றும் துர்க்கை அம்மன்
• மூன்று தீர்த்தங்கள்- சூரிய தீர்த்தம், சந்திர தீர்த்தம் மற்றும் அக்னி தீர்த்தம்
• மூன்று ஸ்தல விருக்ஷங்கள் - வடவாள், வில்வம் மற்றும் கொன்றை
• இக்கோயில் புதனுக்கு மிகவும் பிரசித்தி பெற்றது.
• நவக்கிரக கோயில்களில் இதுவும் ஒன்று
• பார்வதி தேவியின் சன்னதிக்கு இடப்புறம் புதன் சன்னதி அமைந்துள்ளது.
• மூன்று தீர்த்தங்களிலும் நீராடிவிட்டு இங்குள்ள இறைவனை வழிபடுவது மிகவும் புண்ணியமாக கருதப்படுகிறது. இவ்வாறு செய்வதன் மூலம் செல்வ செழிப்புடன் செல்வதாக பக்தர்கள் நம்புகின்றனர். இது அவர்களின் குழந்தைகளின் முன்னேற்றத்திற்கும் பயனுள்ளதாக கருதப்படுகிறது. இங்குள்ள இறைவனை வழிபடுவதால் ஏற்படும் பலன்களைப் பற்றியும் திருஞானசம்பந்தர் தம் பாடலில் பாடியுள்ளார்.
• கார்த்திகை மாதம் நள்ளிரவில் 'அகோரபூஜை' என்று அழைக்கப்படும் சிறப்பு பூஜை அகோரமூர்த்திக்கு செய்யப்படுகின்றது. இந்த பூஜையின் போது இறைவனை வழிபடுவது மிகவும் மங்களகரமானது என நம்பப்படுகிறது.
• வல்லப கணபதி வல்லப தேவியுடன் ஒரு சன்னதியில் வீற்றிருக்கிறார். இது ஒரு பழமையான மற்றும் பாரம்பரிய வீட்டைப் போன்று உள்ளது. இது உண்மையில் தானியங்கள் மற்றும் நெல் சேமிப்பதற்கான ஒரு களஞ்சியம். இந்த விநாயகரை வழிபட்டால் வறுமையின் பிடியில் இருந்து விடுபடலாம். இங்கு மனைவியுடன் விநாயகரை தரிசிப்பதால், திருமண தடைகள் நீங்கும் என பக்தர்கள் நம்புகின்றனர்.
• இத்தலத்தின் துர்க்கை மற்றும் காளி மிகவும் பிரசித்தி பெற்றவர்கள். இந்த இரண்டு சிலைகளும் மிகவும் கலைநயத்துடன் செதுக்கப்பட்டுள்ளன.
• மூர்த்தி, ஸ்தலம் மற்றும் தீர்த்தம், இறைவனின் மகிமை, பூமியின் புனிதம் மற்றும் புனிதமான கோயில் குளங்கள் ஆகிய மூன்று முக்கிய அம்சங்களுக்காக இந்த கோயில் குறிப்பிடத்தக்கதாக கருதப்படுகிறது.
• இக்கோயிலில் சந்திர தீர்த்தத்தின் அருகே, பழமையான பெரிய அரச மரம் உள்ளது. இந்த மரத்தின் கீழ் சிவபெருமானின் காலடித் தடம் (ருத்ர பாதம்) கயாவில் காணப்படும் விஷ்ணு பாதம் போன்றே வைக்கப்பட்டுள்ளது. இங்கு முன்னோர்களுக்கு 'ஸ்ரார்த்தம்' மற்றும் 'தர்ப்பணம்' போன்ற சடங்குகள் செய்வது மிகவும் மங்களகரமானதாக கருதப்படுகிறது. பெருமளவிலான மக்கள் இவ்வாறான சடங்கு சம்பிரதாயங்களை இங்கு மேற்கொள்வதைக் காணலாம்.
• மாணிக்கவாசகர், பட்டினத்தார், சேக்கிழார், கபிலர் மற்றும் பரணர் ஆகியவர்களும் மகான்களும் இங்கு பாடல்களை பாடியுள்ளனர்.
• 63 நாயன்மார்களில் ஒருவரான சிறுத்தொண்ட நாயனாரின் மனைவி திருவெண்காட்டு நங்கை பிறந்த தலம் இது.
• நரம்பு சம்பந்தமான நோய்களால் பாதிக்கப்பட்டவர்கள் இங்குள்ள புதனை வழிபடலாம். புதன் கல்வி மற்றும் வணிகத்திற்கு பொறுப்பான இறைவன் என்று நம்பப்படுகிறது. எனவே, பகவான் பூதனை வழிபடுவதன் மூலம், சிறந்த கல்வி, அறிவு, ஞானம், சொற்பொழிவுத் திறன் மற்றும் தொழில்களில் முன்னேற்றம் ஆகியவற்றைப் பெறுவார்கள் என்று பக்தர்கள் நம்புகிறார்கள்.
• இங்குள்ள இறைவனை வழிபட்டால் முற்பிறவியில் செய்த பாவங்கள் நீங்கும் என்பது பக்தர்களின் நம்பிக்கை.
• திருமண வரம் மற்றும் குழந்தை வரம் வேண்டுவோர் இங்குள்ள இறைவனை வேண்டிக் கொள்ளலாம் என்று நம்பப்படுகிறது.

திறந்திருக்கும் நேரம்

• காலை 6 முதல் 1 மணி வரை
• மாலை 4 முதல் 9 மணி வரை

விழாக்கள்

• மாசியில் பிரம்மோத்ஸவம் (இந்திர விழா)
• ஆடியில் ஆடி பூரம்
• ஆவணியில் விநாயகர் சதுர்த்தி
• புரட்டாசியில் நவராத்திரி
• ஐப்பசியில் ஸ்கந்த ஷஷ்டி மற்றும் அன்னாபிஷேகம்
• மார்கழியில் ஆருத்ரா தரிசனம்
• பங்குனியில் அகோரமூர்த்திக்கு “லட்சார்ச்சனை”
• கார்த்திகை மாதத்தில் மூன்றாவது ஞாயிற்றுக்கிழமை நள்ளிரவில் அகோரமூர்த்திக்கு 'அகோரபூஜை' எனப்படும் சிறப்பு பூஜைகள் செய்யப்படும்.
• வைகாசியில் ஐராவதம் (இந்திரனின் வெள்ளை யானை) சாப விமோசனம் பெற்ற சம்பவத்தைக் கொண்டாடும் வகையில் திருவிழா நடைபெறும்.
• ஆடியில் பட்டினத்தார் சிவபெருமானிடம் இருந்து "சிவ தீக்ஷை" பெற்ற புராணத்தை கொண்டாடும் ஒரு திருவிழா நடைபெறும்.
• பிரதோஷமும் தொடர்ந்து அனுசரிக்கப்படும்.

பதிகம்

• திருஞானசம்பந்தர் பாடிய பதிகம்

கண்காட்டு நுதலானுங் கனல்காட்டுங் கையானும்
பெண்காட்டும் உருவானும் பிறைகாட்டுஞ் சடையானும்
பண்காட்டும் இசையானும் பயிர்காட்டும் புயலானும்
வெண்காட்டில் உறைவானும் விடைகாட்டுங் கொடியானே.

பேயடையா பிரிவெய்தும் பிள்ளையினோ டுள்ளநினை
வாயினவே வரம்பெறுவர் ஐயுறவேண் டாவொன்றும்
வேயனதோ ளுமைபங்கன் வெண்காட்டு முக்குளநீர்
தோய்வினையா ரவர்தம்மைத் தோயாவாந் தீவினையே.

மண்ணொடுநீ ரனல்காலோ டாகாயம் மதிஇரவி
எண்ணில்வரு மியமானன் இகபரமு மெண்டிசையும்
பெண்ணினொடாண் பெருமையொடு சிறுமையுமாம் பேராளன்
விண்ணவர்கோன் வழிபடவெண் காடிடமா விரும்பினனே.

விடமுண்ட மிடற்றண்ணல் வெண்காட்டின் தண்புறவின்
மடல்விண்ட முடத்தாழை மலர்நிழலைக் குருகென்று
தடமண்டு துறைக்கெண்டை தாமரையின் பூமறையக்
கடல்விண்ட கதிர்முத்த நகைகாட்டுங் காட்சியதே.


வேலைமலி தண்கானல் வெண்காட்டான் திருவடிக்கீழ்
மாலைமலி வண்சாந்தால் வழிபடுநன் மறையவன்றன்
மேலடர்வெங் காலனுயிர் விண்டபினை நமன்தூதர்
ஆலமிடற் றான்அடியார் என்றடர அஞ்சுவரே.

தண்மதியும் வெய்யரவுந் தாங்கினான் சடையினுடன்
ஒண்மதிய நுதலுமையோர் கூறுகந்தான் உறைகோயில்
பண்மொழியால் அவன்நாமம் பலவோதப் பசுங்கிள்ளை
வெண்முகில்சேர் கரும்பெணைமேல் வீற்றிருக்கும் வெண்காடே.

சக்கரமாற் கீந்தானுஞ் சலந்தரனைப் பிளந்தானும்
அக்கரைமே லசைத்தானும் அடைந்தயிரா வதம்பணிய
மிக்கதனுக் கருள்சுரக்கும் வெண்காடும் வினைதுரக்கும்
முக்குளம்நன் குடையானும் முக்கணுடை இறையவனே.

பண்மொய்த்த இன்மொழியாள் பயமெய்த மலையெடுத்த
உன்மத்தன் உரம்நெரித்தன் றருள்செய்தான் உறைகோயில்
கண்மொய்த்த கருமஞ்சை நடமாடக் கடல்முழங்க
விண்மொய்த்த பொழில்வரிவண் டிசைமுரலும் வெண்காடே.

கள்ளார்செங் கமலத்தான் கடல்கிடந்தான் எனஇவர்கள்
ஒள்ளாண்மை கொளற்கொடி உயர்ந்தாழ்ந்தும் உணர்வரியான்
வெள்ளானை தவஞ்செய்யும் மேதகுவெண் காட்டானென்(று)
உள்ளாடி உருகாதார் உணர்வுடைமை உணரோமே.

போதியர்கள் பிண்டியர்கள் மிண்டுமொழி பொருளென்னும்
பேதையர்கள் அவர்பிறிமின் அறிவுடையீர் இதுகேன்மின்
வேதியர்கள் விரும்பியசீர் வியன்திருவெண் காட்டானென்
றோதியவர் யாதுமொரு தீதிலரென் றுணருமினே.

தண்பொழில்சூழ் சண்பையர்கோன் தமிழ்ஞான சம்பந்தன்
விண்பொலிவெண் பிறைச்சென்னி விகிர்தனுறை வெண்காட்டைப்
பண்பொலிசெந் தமிழ்மாலை பாடியபத் திவைவல்லார்
மண்பொலிய வாழ்ந்தவர்போய் வான்பொலியப் புகுவாரே.

உசாத்துணை

• 69 Famous Temples To Visit In Mayiladuthurai: Dharisanam

‎

---

✅Finalised Page