விடுதலைக்கு முந்தைய தமிழ்த் திரைப்படங்கள்

பக்த சேதா, பர்த்ருஹரி மற்றும் இரு சகோதரர்கள் திரைப்பட விளம்பரம்

விடுதலைக்கு முன்பாகத் தமிழில் பல திரைப்படங்கள் வெளியாகின. 1918 தொடங்கி, தமிழ்த் திரையுலகின் ஆரம்ப காலத்தில் வெளியான படங்கள் பலவும் பேசாப் படங்கள் என்னும் சலனப் படங்களே. 1918-ல் வெளியான ‘கீசக வதம்’ தான் தமிழின் முதல் சலனத் திரைப்படமாகக் கருதப்படுகிறது. 1931 தொடங்கி பேசாப் படங்களின் எண்ணிக்கை குறைந்து பேசும் படங்கள் அதிகம் வெளியாகத் தொடங்கின.

பக்த துகாராம் திரைப்படம்

சலனப் படங்கள்

தமிழில் வெளியான முதல் சலனப் படம் கீசக வதம் (1918). தமிழில் முதன் முதலில் அம்முயற்சியை மேற்கொண்டவர் ஆர். நடராஜ முதலியார். அதனைத் தொடர்ந்து ‘திரௌபதி வஸ்திராபரணம்’, ‘மஹிராவணன்’, ‘மார்க்கண்டேயன்’ போன்ற பல பேசாப் பட முயற்சிகள் முன்னெடுக்கப்பட்டன.

தணிக்கை முயற்சிகள்

பிரிட்டிஷார் ஆட்சிக் காலத்தில், தணிக்கை வாரியம் காவல்துறை ஆணையாளர்களால் செயல்படுத்தப்பட்டது. 1918-ம் ஆண்டு ஆரம்பித்த இத்தணிக்கைச் செயல்பாடுகள், சுதந்திரப் போராட்டத்திற்கு வலுவூட்டிய ஒத்துழையாமை இயக்க ஆண்டுகளில் (1920) கடுமையாக்கப்பட்டன. அதனால் சில படங்கள் தயாரிப்பு நிலையிலேயே கைவிடப்பட்டன. தேசியக் கருத்துக்களையோ, காந்திய சமூக சீர்திருத்தங்களையோ ஆதரித்த காட்சிகள் வெட்டப்பட்டன. ஆகவே, புராணக் கதைகளையும், நாடகம் மற்றும் மாயாஜாலம் சார்ந்த சாகசக் கதைகளையுமே தயாரிப்பாளர்கள் அதிகம் தயாரிக்க முன் வந்தனர்.

விஷ்ணுலீலா திரைப்பட விளம்பரம்

பேசும் படங்கள்

தமிழின் முதன்முதலில் வெளிவந்த பேசும் படமாக 1931-ல் வெளிவந்த ‘காளிதாஸ்’ திரைப்படம் கருதப்படுகிறது. ஆனால், அதற்கும் முன்பாக, அதே ஆண்டில், ‘குறத்திப் பாட்டும், டான்ஸூம்’ என்னும் குறும்படம் வெளியானது. நான்கு ரீல்கள் கொண்ட அப்படமே தமிழின் முதல் பேசும்படம் (அ) குறும்படமாகக் கருதப்படுகிறது. அதனைத் தொடர்ந்து புராணக் கதைகளை அடிப்படையாகக் கொண்டு ‘ராமாயணம்’, ‘காலவா’, ‘சத்தியவான் சாவித்திரி’, ‘கிருஷ்ண லீலா’ போன்ற படங்கள் வெளியாகின. அக்காலத்தின் புகழ்பெற்ற நாடகங்களான ‘வள்ளி திருமணம்’, ‘ஹரிச்சந்திரா’, ‘பிரகலாதா’, ‘நந்தனார்’, ‘கோவலன்’ போன்றவையும் திரைப்படங்களாக வெளிவந்தன.

தடைகளும் விலக்குகளும்

தொடக்க காலத்தில், புராண, வரலாற்றுப் படங்களே அதிகம் வெளிவந்தன. பின்னரே சமூகம் சார்ந்த, மக்களின் பிரச்சனைகளைப் பேசும் மேனகா, ராஜாம்பாள், டம்பாச்சாரி போன்ற நாவல்களாக, நாடகங்களாக வெளிவந்து வெற்றிபெற்ற துப்பறியும் கதைகள் சில திரைப்படங்களாக வெளிவரத் தொடங்கின.

சென்னை ராஜதானியில், 1937 முதல் 1939 வரை காங்கிரஸ் கட்சி பதவியில் இருந்தது. அப்போது தணிக்கை முறை விலக்கி வைக்கப்பட்டது. இக்காலக்கட்டத்தில் தியாகபூமி, மாத்ருபூமி போன்ற நாட்டுப்பற்றைப் போற்றும் திரைப்படங்கள் வெளிவந்தன. ஆனால் இரண்டாம் உலகப் போரில், ஆங்கிலேய அரசு இந்தியாவை ஈடுபடுத்தியதற்கு எதிர்ப்புத் தெரிவித்து, காங்கிரஸ் அரசு விலகியதால், ஆங்கிலேய அரசு தியாகபூமி போன்ற திரைப்படங்களுக்கு தடை விதித்தது. தணிக்கை முறையைக் கடுமையாக்கியது. போர்க்காலத்தில் கச்சா ஃபிலிம் தட்டுபாடு காரணமாகத் திரைப்படங்கள் இயக்கப்படுவது வெகுவாகக் குறைந்தது. விடுதலைக்குப் பின்னர் அதிகத் திரைப்படங்கள் வெளிவரத் தொடங்கின.