யோ. ஞான சந்திர ஜாண்சன்
- சந்திரன் என்ற பெயரில் உள்ள மற்ற பக்கங்களைப் பார்க்க: சந்திரன் (பெயர் பட்டியல்)
- ஞான என்ற பெயரில் உள்ள மற்ற பக்கங்களைப் பார்க்க: ஞான (பெயர் பட்டியல்)
யோ. ஞான சந்திர ஜாண்சன் (பிறப்பு: ஆகஸ்ட் 11, 1957) தமிழ் ஆய்வாளர், பேராசிரியர். தமிழ்க் கிறிஸ்தவ இலக்கியங்களை ஆய்வு செய்வதில் ஈடுபாடு கொண்டவர். தமிழ்க் கிறிஸ்தவ இலக்கியத்திற்கு பங்களிப்பாற்றியவர்கள், தமிழ்க் கிறித்தவக் கீர்த்தனைகள், தமிழ்க் கிறித்தவக் காப்பியங்கள் ஆகியவற்றைப் பற்றிய இவரின் நூல்கள் குறிப்பிடத்தகுந்தவை.
பிறப்பு, கல்வி
யோ. ஞான சந்திர ஜாண்சன் தமிழ்நாட்டிலுள்ள கன்னியாகுமாரி மாவட்டத்தில் மயிலாடியில் ஆகஸ்ட் 11, 1957-ல் பிறந்தார். தந்தை பெயர் ஞா.யோவான், அம்மா பெயர் யோ.பரமாயி.
நாகர்கோவிலிலுள்ள தெ.தி. இந்துக் கல்லூரியில் தமிழ் இலக்கியத்தில் முதுகலைப்பட்டம், ஆய்வியல் நிறைஞர், முனைவர் பட்டம் ஆகியவற்றைப் பெற்றார். 'நீல பத்மநாபன் நாவல்களில் பாத்திரப்படைப்பு' என்ற தலைப்பில் முனைவர் பட்ட ஆய்வு செய்தார்.
தனிவாழ்க்கை
ஞானசந்திர ஜாண்சனின் மனைவி பெயர் ஷீபா நேசகுமாரி. மகள் கீர்த்தனா கேலப், மகன் இம்ம்மானுவேல் ஜான்சன்.
ஆசிரியப்பணி
யோ. ஞான சந்திர ஜாண்சன் சென்னை கிறித்தவக் கல்லூரி தமிழ்த் துறையில் இணைப்பேராசிரியராகப் பணியாற்றி மே மாதம் 2016-ல் ஓய்வுபெற்றார். இவரது மேற்பார்வையின் கீழ் இருபத்தைந்து பேர் முனைவர் பட்டமும், முப்பத்தியிரண்டு பேர் இளநிலை ஆய்வுப் பட்டமும் பெற்றனர்.
ஆய்வு வாழ்க்கை
யோ. ஞான சந்திர ஜாண்சன் தமிழ்க்கிறிஸ்தவ இலக்கிய ஆய்வாளராக அறியப்படுகிறார். பேராசிரியர் அ.கா. பெருமாளின் மாணவர்.
ஞானசந்திர ஜாண்சன் ஆய்வுநூல்களாகவும், தொகைநூல்களாகவும், ஆய்வுப்பதிப்புகளாகவும் கிறிஸ்தவ இலக்கியத்திற்கு குறிப்பிடத்தக்க பங்களிப்பாற்றியவர். 'கிறித்தவக் கீர்த்தனைக் கவிஞர்கள்' என்னும் நூலை கீர்த்தனா பதிப்பகத்தின் மூலம் 2003-ல் வெளியிட்டார். இந்நூலின் விரிவாக்கப்பட்ட பதிப்பு 2009-ல் வெளியானது. 'எச்.ஏ. கிருஷ்ணபிள்ளை', 'ஜெர்மானிய இறைத்தொண்டர் ரிங்கல்தெளபே', 'அருட்பணியாளர் இராபர்ட் கால்டுவெல்', 'வேதநாயக சாஸ்திரியார் போன்ற்வை குறிப்பிடத்தக்க நூல்கள்., 'ம.பொ.சி. யின் வாழ்க்கை வரலாற்று இலக்கியங்கள்', 'மில்லர் என்னும் மாமனிதர்', 'Dr. William Miller' போன்றவை இவர் அறிஞர்களைப் பற்றி எழுதிய நூல்கள்.
கன்னியாகுமரி மாவட்டத்தின் ஆதித்திருச்சபையாகிய மயிலாடி திருச்சபையின் 200-ம் ஆண்டு விழாவின் போது வெளியிடப்பட்ட சிறப்பு மலரின் தொகுப்பாசிரியர். 2008-ல் "எச்.ஏ. கிருஷ்ணபிள்ளை" என்னும் இவரின் நூல் சாகித்ய அகாடமி வெளியீடாக வந்தது. சென்னை கிறித்தவக் கல்லூரியின் தமிழ்த்துறையின் மூலம் இரு தொகுதிகளாக வெளிவந்த 'கிறித்தவத் தமிழியல் ஆய்வுக்கோவை' என்னும் நூலின் பதிப்பாசிரியர்.
விருதுகள்
- உலக கிறித்தவத் தமிழ்ப் பேரவை 'தமிழ்மாமணி' விருது வழங்கியது.
- 2026 ஆண்டுக்கான தமிழ் விக்கி- தூரன் விருது
இலக்கிய இடம்
யோ.ஞானசந்திர ஜாண்சன் தமிழ் கிறிஸ்தவ இலக்கிய மரபின் ஆய்வாளர்களில் முக்கியமானவர். மறைந்துவிடும் நிலையில் இருந்த கிறிஸ்தவ காப்பியங்கள், கிறிஸ்தவ கீர்த்தனைகள் ஆகியவற்றை முழுமையாகத் தேடித்தொகுத்து வெளியிடும் முயற்சியில் முப்பதாண்டுகளுக்கும் மேலாகச் செயல்பட்டுவருகிறார். கிறிஸ்தவ இலக்கிய முன்னோடிகளைப் பற்றிய விரிவான வாழ்க்கைவரலாற்றுப் பதிவுகளையும் உருவாக்கியிருக்கிறார்.
நூல் பட்டியல்
ஆய்வுநூல்கள்
- கிறித்தவக் கீர்த்தனைக் கவிஞர்கள் (2003)
- எச்.ஏ. கிருஷ்ணபிள்ளை (2008)
- ம.பொ.சி. யின் வாழ்க்கை வரலாற்று இலக்கியங்கள் (2009)
- நம்பி அகப்பொருள் விளக்கம் (2010)
- கிறித்தவ பஜனைக் கீதங்கள் (2013)
- ஜெர்மானிய இறைத்தொண்டர் ரிங்கல்தெளபே (2016)
- அருட்பணியாளர் இராபர்ட் கால்டுவெல் (2019)
- வேதநாயக சாஸ்திரியார் (2020)
ஆங்கிலம்
- Dr. William Miller (2023)
- Reflections from a christian college (Editor)
மொழிபெயர்ப்பு
- சென்னை கிறித்தவக் கல்லூரியின் வாழ்வும் வளமரபும் (2016)
- அமைதிக் கல்வி (2017)
- மில்லர் என்னும் மாமனிதர் (2012)
பதிப்பாசிரியர்
- கிறிஸ்தவத் தமிழ் இலக்கியம் : ஓர் அறிமுகம்
- கிறித்தவ இலக்கிய வளம்
- கிறித்தவச் சிற்றிலக்கியத் திரட்டு
- கிறித்தவ இலக்கியத் திறன்
- ஆய்வுச் சுவடுகள்
- கிறிஸ்தாயனம் (2008)
- கிறித்தவத் தமிழ் இலக்கியம் (2008)
- கிறித்தவத் தமிழியல் ஆய்வுக்கோவை (2008)
- கிறிஸ்தவக் கீர்த்தனைகள் ஆய்வுப்பதிப்பு (2021) (தொகுப்பாசிரியர்)
- கிறிஸ்தவப் பஜனைக் கீதங்கள்
- கிறிஸ்தவக் காப்பியங்கள்.
உசாத்துணை
- கிறித்தவக் காப்பியங்கள் - முனைவர் யோ. ஞான சந்திர ஜாண்சன் - tamildigitallibrary
- கிறித்தவ இசைப்பாடலாசிரியர்கள் - ஜெயமோகன் தளம்
- ஞானசந்திர ஜாண்சன் இணையப்பக்கம்
- கிறிஸ்தவ இலக்கியத் திரட்டு இணையநூலகம்
- கிறிஸ்தவத் தமிழ் இலக்கியம் : ஓர் அறிமுகம் இணையநூலகம்
✅Finalised Page
முதலில் வெளியிடப்பட்ட தேதி:
30-May-2024, 09:08:43 IST
