மோனியர் வில்லியம்ஸ்
மோனியர் வில்லியம்ஸ் (Monier_Monier-Williams) (நவம்பர் 12, 1819 - ஏப்ரல் 11, 1899) சமஸ்கிருத அறிஞர், அகராதியியலாளர், ஆய்வாளர், பேராசிரியர். சமஸ்கிருத-ஆங்கில அகராதியைத் தொகுத்தார். காளிதாசரின் சமஸ்கிருத நாடகங்களை ஆங்கிலத்தில் மொழிபெயர்த்தார். 'Hinduism' என்ற சொல்லை பொதுவான ஆங்கிலப் பயன்பாட்டில் அறிமுகப்படுத்தினார். தொல்வேத மொழியின் உண்மையான அர்த்தங்களை அறிய உதவினார். இந்தியாவின் கலாச்சார பாரம்பரிய மீட்டுருவாக்கத்திற்கு தன் ஆய்வின் மூலம் புதிய முகம் அளித்தவர்களில் ஒருவர்.
பிறப்பு, கல்வி
மோனியர் வில்லியம்ஸ் பம்பாய் மாகாணத்தில் சர்வேயர் ஜெனரலான கர்னல் மோனியர் வில்லியம்ஸின் மகனாகப் பிறந்தார். அவரது குடும்பப்பெயர் 'வில்லியம்ஸ்'. 1822-ல் இங்கிலாந்தில் கல்வி கற்க அனுப்பப்பட்டார். ஹோவ்(Hove), செல்சி(Chelsea), பின்ச்லியில்(Finchley) உள்ள தனியார் பள்ளிகளில் பள்ளிக்கல்வி பயின்றார். கிங்ஸ் கல்லூரிப் பள்ளி, ஆக்ஸ்போர்டில் உள்ள பாலியோல் கல்லூரி(Balliol College) , கிழக்கிந்திய கம்பெனி கல்லூரி, ஆக்ஸ்போர்டில் உள்ள பல்கலைக்கழகக் கல்லூரி (University College, Oxford) ஆகியவற்றில் கல்வி பயின்றார். 1844-ல் 'Literae Humaniores' என்று அழைக்கப்பட்ட இளங்கலைப் பட்டம் (கிரேக்க, ரோம செவ்விலிலக்கியங்கள்) நான்காம் வகுப்பில் பெற்றார்.
தனிவாழ்க்கை
மோனியர் வில்லியம்ஸ் 1848-ல் ஜூலியா கிரந்தத்தை மணந்தார். இவ்விணையர்களுக்கு ஆறு மகன்கள், ஒரு மகள். ஜூலியா தன் எழுபத்தியொன்பது வயதில் பிரான்சின் கேன்ஸில் காலமானார்.
1874-ல் மோனியர் வில்லியம்ஸ் இங்கிலாந்திலுள்ள என்ஃபீல்ட் ஹவுஸில் ஒரு வீடு வாங்கி அங்கு குடும்பத்துடன் தன் இறுதிகாலம் வரை வசித்தார்.
ஆசிரியப்ப்பணி
மோனியர் வில்லியம்ஸ் கிழக்கிந்திய கம்பெனி கல்லூரியில் ஆசிய மொழிகளை 1844 முதல் 1858 வரை கற்பித்தார். 1857 கிளர்ச்சிக்குப் பிறகு இந்தியாவில் கம்பெனி ஆட்சி முடிவுக்கு வந்தது. 1860 முதல் இங்கிலாந்தின் ஆக்ஸ்போர்டு பல்கலைக்கழகத்தில் சமஸ்கிருத மொழிப் பேராசிரியராக இருந்தார்.
அமைப்புப் பணிகள்
- 1890-ல் ராயல் ஆசியடிக் சொசைட்டி துணைத் தலைவர்
- 1880-ல் ஆக்ஸ்போர்டு பல்கலைக்கழக பல்லியோல் கல்லூரியின் உறுப்பினர்
- 1886-ல் அமெரிக்கன் தத்துவவியல் சங்கத்தின் உறுப்பினர்
- 1892-ல் ஆக்ஸ்போர்டு பல்கலைக்கழகக் கல்லூரியின் கௌரவ உறுப்பினர்
இந்திய நிறுவனம்
மோனியர் வில்லியம்ஸ் 1870-களின் முற்பகுதியிலிருந்தே இந்தியா, இங்கிலாந்தை நன்கு அறிந்து கொள்ளும் பொருட்டு ஒரு அமைப்பை உருவாக்க வேண்டும் என்ற முனைப்பில் இருந்தார். 1883-ல் மோனியர் வில்லியம்ஸ் ஆக்ஸ்ஃபோர்ட் பல்கலைக்கழகத்தில் 'இந்திய நிறுவனம்' (Indian Institute) என்ற அமைப்பை நிறுவினார். இது இந்தியக் குடிமைப் பணிக்கான பயிற்சி மையமாக இருந்தது. மேலும் இந்நிறுவனத்தின் வழி இந்திய கலாச்சாரத்தை ஆராய்ச்சி செய்ய ஊக்குவித்தார். மோனியர் வில்லியம்ஸ் 1875, 1876, 1883-ம் ஆண்டுகளில் தனது திட்டத்திற்கு நிதி திரட்டுவதற்காக இந்தியாவிற்கு பயணம் செய்தார். இந்தியாவின் பூர்வீக இளவரசர்களின் ஆதரவைப் பெற்றார். 1883-ல் வேல்ஸ் இளவரசர் இந்திய நிறுவனம்(Indian Institute) அமைப்பிற்கான அடிக்கல் நாட்டினார். இந்த கட்டிடம் 1896-ல் லார்ட் ஜார்ஜ் ஹாமில்டனால் திறக்கப்பட்டது. 1947-ல் இந்தியா சுதந்திரம் பெற்றவுடன் நிறுவனம் மூடப்பட்டது. இங்கு நூலகமும், அருங்காட்சியகமும் மோனியர் வில்லியம்ஸின் முயற்சியால் உருவாக்கப்பட்டன. இந்திய நிறுவனம் கிழக்காசிய நாடுகளின் வரலாறு, கலாச்சாரம் ஆகியவற்றைப் பற்றி அறிவதில் ஆர்வம் கொண்டது.
ஆய்வு வாழ்க்கை
ஹோரேஸ் ஹேமன் வில்சன் 1831-ல் ஆக்ஸ்போர்டு பல்கலைக்கழகத்தில் தலைமைப் பொறுப்பை ஏற்றதும் பல்கலைக்கழகத்தின் சமஸ்கிருத கையெழுத்துப் பிரதிகளின் தொகுப்பைத் தொடங்கினார். 1860-ல் ஹோரேஸ் ஹேமன் வில்சன் காலமானார். அவருக்குப்பின் மோனியர் வில்லியம்ஸ் தான் தன் இடத்தை நிரப்ப வேண்டும் என அவர் விரும்பியிருந்தார். பல்கலைக்கழக தேர்வுக் குழுவில் மேக்ஸ் முல்லருக்கு எதிராக தேர்தலில் நின்று வெற்றி பெற்று மோனியர் வில்லியம்ஸ் சமஸ்கிருதப் பேராசிரியரானார். 1860 முதல் 1899 வரை அப்பதவியில் இருந்தார்.
பேராசிரியராக நியமிக்கப்பட்ட பிறகு வில்லியம்ஸ் இந்தியாவை கிறிஸ்தவ மதத்திற்கு மாற்றுவது ஓரியண்டலிஸ்ட்களின் முக்கிய நோக்கங்களில் ஒன்றாக இருக்க வேண்டும் என்ற கருத்தை முன்வைத்தார். 1877-ல் அவர் வெளியிட்ட 'Hinduism' என்ற நூலில் இந்து மதத்தின் அழிவைப் பற்றி முன் அறிவித்தார். இஸ்லாம் பரவுவதைத் தடுக்க கிறிஸ்தவ மதப்பிரச்சாரத்திற்கு அழைப்பு விடுத்தார். மோனியர் வில்லியம்ஸ் இந்தியாவைப் பற்றிய விரிவான நடைமுறை அறிவையும், நவீன இந்து மதத்தில் உள்ள உண்மையான மத நடைமுறைகளைப் பற்றிய அறிவையும் கொண்டிருந்தார். மோனியர் வில்லியம்ஸ் ஆசிய மொழிகளான சமஸ்கிருதம், பாரசீகம், இந்துஸ்தானி ஆகியவற்றைப் பயின்றார். செமிடிக் மொழிகளுக்கும் தொல் ஆசிய மொழிகளுக்கு இடையிலான ஒற்றுமையை ஆய்வு செய்தார். இந்து மதம், பிரமாணியம் போன்றவற்றைப் பற்றிய தத்துவார்த்தமான தன் புரிதல்களை வெளியிட்டார். இதன்மூலம் நவீன இந்தியாவின் கலாச்சார மீட்டுருவாக்கத்திற்கு பங்களித்தார்.
இந்து மதம்
- மோனியர் வில்லியம்ஸ் இந்து மதத்தைப் பற்றிய தனது எழுத்துக்களில் அத்வைத வேதாந்தமே வேதகால லட்சியத்தை சிறப்பாகப் பிரதிநிதித்துவப்படுத்துவதாகவும், முக்திக்கான மிக உயர்ந்த வழி என்றும் வாதிட்டார்.
- கர்மா, பக்தி போன்ற பிரபலமான மரபுகளை குறைந்த ஆன்மீக மதிப்புடையவை என்று கருதினார்.
- இந்து மதம் "பெரிய பலகோணம் அல்லது ஒழுங்கற்ற பலதரப்பு உருவம்" என்றும் அது சமஸ்கிருத இலக்கியத்தால் ஒருங்கிணைக்கப்பட்ட ஒன்றாக உள்ளதாகவும் கூறினார்.
- உலகம் இதுவரை அறிந்த எல்லா மத மற்றும் தத்துவக் கருத்தையும் விட பரந்துபட்டது என இந்துமதத்தைப் பற்றிக் கூறினார்.
- பிராமணியம் என்பது கடவுளை பிரபஞ்சத்துடன் அடையாளப்படுத்தும் ஆன்மீகக் கோட்பாடு என்று விவரித்தார். பிரம்மா என்பது படைப்பாளி என்றும் மற்ற எல்லா உயிர்களும் ஒன்றிலிருந்தே உருவானது என்றும் விவரித்தார்.
இலக்கிய வாழ்க்கை
மோனியர் வில்லியம்ஸ் 1872-ல் பீட்டர்ஸ்பர்க் சமஸ்கிருத அகராதியை அடிப்படையாகக் கொண்டு சமஸ்கிருதம்-ஆங்கில அகராதியை தொகுத்தார். 1877-ல் 'Hinduism' என்ற நூலை எழுதினார். இதன் திருத்தப்பட்ட பதிப்பு 1899-ல் எர்ன்ஸ்ட் லியூமன், கார்ல் கேப்பல்லர் ஆகியோரின் ஒத்துழைப்புடன் வெளியானது. காளிதாசரின் நாடகங்களை சமஸ்கிருதத்திலிருந்து ஆங்கிலத்திற்கு மொழிபெயர்த்தார்.
விருதுகள்
- 1876-ல் நைட் பட்டம் பெற்றார்
- 1875-ல் ஆக்ஸ்ஃபோர்ட் பல்கலைக்கழக கெளரவ DCL
- 1876-ல் கல்கத்தா பல்கலைக்கழக எல்எல்டி
- 1880-ல் கோட்டிங்கன் கல்லூரியின் கௌரவ முனைவர் பட்டம்
மறைவு
மோனியர் வில்லியம்ஸ் ஏப்ரல் 11, 1899 ல் பாரீஸில் காலமானர்
இலக்கிய/பண்பாட்டு/வரலாற்று இடம்
மோனியர் வில்லியம்ஸ் ”பண்படாத வாக்கிய அமைப்புகளைக் கொண்ட செமிடிக் மொழிகளை ஆராய்ச்சி செய்தார். வேதம் எழுதப்பட்ட மற்ற தொல் மொழிகளுடன் செமிடிக் மொழிகளை ஒப்புமை செய்து அதன் உண்மையான அர்த்தங்களை மீட்டளித்தார்.” என ஜெயமோகன் மதிப்பிடுகிறார்.
மோனியர் வில்லியம்ஸின் Hinduism என்ற நூலைப்பற்றி சௌரப் துபே குறிப்பிடுகையில் "இந்து மதம் என்ற சொல்லை பொதுவான ஆங்கிலப் பயன்பாட்டில் அறிமுகப்படுத்தியதற்காக பரவலாகப் போற்றப்படுகிறது" என்றார்.
நூல் பட்டியல்
- A Dictionary of English and Sanskrit (London: Allen & Co, 1851)
- A Practical Grammar of the Sanskrit Language (Oxford: Oxford University Press, 1857)
- Indian Wisdom (London: Allen & Co., 1875)
- Hinduism (London: Society for promoting Christian Knowledge, 1877)
- Modern India and the Indians (London: Trubner and Co., 1878)
- Religious Thought and Life in India (London: John Murray, 1883)
- Buddhism in its Connexion with Brahmanism and Hinduism, and in its contrast with Christianity (London: John Murray, 1889)
- An Elementary Grammar of the Sanscrit Language
- Original papers illustrating the history of the application of the Roman alphabet to the languages of India (1859)
- Brahmanism and Hinduism (1883)
- A Sanskrit-English Dictionary: Etymologically and Philologically Arranged with Special Reference to Cognate Indo-European languages (1899)
- The Siksha-Patri of the Swami-Narayana Sect
- The Vedas: For the Samhitas of the Rig, Yajur, Sama, and Atharva: For the Samhitas of the Rig, Yajur, Sama, and Atharva (Jon W. Fergus and Monier Williams)
மொழிபெயர்ப்பு
(சமஸ்கிருதத்திலிருந்து ஆங்கிலம்)
- Sakoontala Or The Lost Ring: An Indian Drama (Hertford, 1853)
- The Vikramorvasiyam
- Nalopakhyanam
- Translation of Shikshapatri
- Hinduism and Its Sources
உசாத்துணை
- Dishonesty of Colonial ‘Scholars’: The Case of Monier Williams: cisindus
- Monier Monier-Williams: Making Britain
- Ancient India: Modern Historians of Ancient India: Utilitarian School, Marxist School, Nationalist School: mrunal
- Origins of Brahmanism: Drishti ias
இணைப்புகள்
- Monier-Williams Sanskrit-English Dictionary, 1899
- Brahmanism and Hinduism by Sir Monier Monier-Williams: bhagavadgitausa
✅Finalised Page
