குறவஞ்சி நூல்கள்

தமிழின் 96 வகைச் சிற்றிலக்கியங்களுள் ஒன்று குறவஞ்சி. ‘குறத்திப் பாட்டு மற்றும் ‘குறம்’ என்ற பெயரும் உண்டு. 'குளுவ நாடகம்' என்பதும் குறவஞ்சி வகையினைச் சேர்ந்ததே. தமிழில் திருக்குற்றாலக் குறவஞ்சி, திருமலையாண்டவர் குறவஞ்சி, திருவாரூர் தியாகராசர் குறவஞ்சி, சரபேந்திர பூபாலக் குறவஞ்சி, திருச்செங்கோட்டுக் குறவஞ்சி என பல புகழ்பெற்ற குறவஞ்சி நூல்கள் உள்ளன.

குறவஞ்சி இலக்கணம்

கடவுளையோ, அரசர்களையோ, வள்ளல்களையோ, செல்வந்தர்களையோ பாட்டுடைத் தலைவராகக் கொண்டு பாடப்படுவது குறவஞ்சி நூல்களின் பொதுவான இலக்கணமாகும். தலைவன் உலாவருதல், தலைவி அவனைக் கண்டு காமுறுதல், காமநோய்கொண்டு வாடுதல், தூதுவிடுத்தல், குறத்தி வருதல், குறி கூறுதல், குறவன் வருதல், குறவன் குறத்தி வாதிடுதல், வாழ்த்துக் கூறுதல், மங்கலம் பாடுதல் போன்ற பகுதிகள் குறவஞ்சி நூல்களில் இடம் பெறும். திரிகூடராசப்பக் கவிராயர் இயற்றிய திருக்குற்றாலக்குறவஞ்சி, தமிழின் முதல் குறவஞ்சி நூலாகக் கருதப்படுகிறது. சரபேந்திர பூபாலக் குறவஞ்சி, திருச்செங்கோட்டுக் குறவஞ்சி போன்றவை புகழ்பெற்ற குறவஞ்சி நூல்களாகும்.

குறவஞ்சி இலக்கிய வகைகள்

தமிழில் பல்வேறு வகை குறவஞ்சி நூல்கள் உள்ளன. பாட்டுடைத் தலைவனின் ஊர்ப் பெயரால் அழைக்கப்படும் திருக்குற்றாலக் குறவஞ்சி, பாட்டுடைத் தலைவனின் பெயரால் அழைக்கப்படும் தியாகேசர் குறவஞ்சி, பாட்டுடைத் தலைவனது ஊரின் பெயரும், பாட்டுடைத் தலைவனின் பெயரும் இணைந்து அழைக்கப்படும் திருவாரூர் தியாகராசர் குறவஞ்சி, தலைவியின் பெயரால் அழைக்கப்படும் தமிழரசி குறவஞ்சி என பல வகைப் பிரிவுகளில் குறவஞ்சி நூல்கள் அமைந்துள்ளன.

சிலவகை குறவஞ்சி நூல்கள் குறத்தியின் பெயராலும் அழைக்கப்படுகின்றன. சான்றாக ‘துரோபதைக் குறவஞ்சி’ என்ற நூலைக் குறிப்பிடலாம்.