ஆர்.சூடாமணி
ஆர்.சூடாமணி ( ) தமிழில் கதைகளையும் நாவல்களையும் எழுதிய எழுத்தாளர். கலைமகள் இதழை மையமாகக் கொண்டு உருவாகி வந்த பெண் எழுத்தாளர்களில் ஒருவர். மரபான பார்வையில் பெண்விடுதலையையும், சமூக உறவுகளின் நுட்பங்களையும், ஒழுக்க அற நெறிகளையும் பேசியவர்.
பிறப்பு, கல்வி
ஆர்.சூடாமணி 10 ஜனவரி 1931 ல் சென்னையில் ராகவனுக்கும் கனகவல்லிக்கும் பிறந்தார். தந்தை ராகவன் அப்போது பிரிட்டிஷ் இந்தியாவின் சென்னை மாகாணத்தின் தலைமைச் செயலராக இருந்தார். கனகவல்லி சிற்பம், ஓவியத்தில் ஈடுபாடு மிக்கவர். சூடாமணியோடு பிறந்தவர்கள் மூன்று சகோதரிகள், ஒரு சகோதரன்.சூடாமணிக்கு, ஐந்தாம் வயதில் அம்மை நோய் தாக்கியது. பலகட்ட சிகிச்சைகளுக்குப் பிறகு மரணத்துக்கு மிக அருகில் சென்று மீண்டு வந்தாலும் இயல்பான உடல் வளர்ச்சி தடைபட்டது. ஆகவே பள்ளி செல்லாமல் வீட்டிலேயே கல்வி கற்றார். தாயிடமிருந்து ஓவியக்கலையை கற்றார். வீட்டுநூலகத்திலேயே படித்தார்
தனிவாழ்க்கை
ஆர்.சூடாமணி திருமணம் புரிந்துகொள்ளவில்லை. எழுத்தாளர் ருக்மிணி பார்த்தசாரதி இவரது சகோதரி. இன்னொரு சகோதரி பத்மாசனி மொழிபெயர்ப்பாளர். இவருடைய பாட்டி ரங்கநாயகி அம்மாளும் எழுத்தாளர்.
இலக்கியவாழ்க்கை
சூடாமணி 1954 முதல் கதைகள் எழுதிவந்தாலும் முதலில் வெளிவந்த சிறுகதை காவேரி.1957-ஆம் ஆண்டு கலைமகள் வெள்ளிவிழா பரிசு பெற்றது இக்கதை. 1959-ஆம் ஆண்டு ’மனதுக்கு இனியவள்' என்னும் நாவல் வெளிவந்தது. இந்நாவலுக்கு சிறந்த நாவலுக்கான கலைமகள் ஸ்ரீநாராயணசாமி ஐயர் விருது வழங்கப்பட்டது. இந்நாவல் சூடாமணியின் தன்வரலாற்றின் சாயல் கொண்டது. சூடாமணி கலைமகள், சுதேசமித்திரன், தினமணிகதிர், கல்கி, ஆனந்த விகடன், குங்குமம், இந்தியா டுடே, புதிய பார்வை போன்ற இடைநிலை மற்றும் வணிக இதழ்களில் தொடர்ந்து எழுதினார். ஆங்கிலத்திலும் ’சூடாமணி ராகவன்' என்ற பெயரில் கதைகளை எழுதியுள்ளார். இவருடைய இரவுச்சுடர் நாவல் ‘யாமினி' என்ற பெயரில் ஆங்கிலத்தில் மொழிபெயர்க்கப்பட்டுள்ளது.
சூடாமணியின் பெரும்பான்மையான கதைகள் குடும்பம் சார்ந்தவை. கதைமாந்தரின் உளநிகழ்வுகளை வெவ்வேறு கோணத்தில் சொல்லமுயல்பவை. ஆனால் உளப்பகுப்புத்தன்மையோ சீண்டும்தன்மையோ அற்றவை. பெண்களின் உரிமை, விடுதலை ஆகியவற்றைப் பற்றிப் பேசினாலும் அவர் பெண்ணியக் கொள்கைகள் எதையும் முன்வைக்கவில்லை
ஓவியம்
இளம் வயதில் முறைப்படி ஓவியம் கற்றிருந்த இவர் நீர்வண்ணங்களைப் பயன்படுத்தி வரைந்துள்ளார். வெகுகாலம் வெளியுலகுக்கு வராத இவரது ஓவியங்கள் 2011 ஆம் ஆண்டு சென்னை சி.பி.ஆர்ட் சென்டரில் கண்காட்சிக்கு வைக்கப்பட்டன
விருதுகள்
- கலைமகள் வெள்ளி விழா விருதும் பரிசும் மனத்துக்கினியவள் நாவலுக்காக (1957)
- இலக்கியச் சிந்தனை ஆண்டு விருதை தமது "நான்காவது ஆசிரமம்' என்ற சிறுகதைக்காகப் பெற்றார்.
- ஆனந்த விகடன் நடத்திய நாடகப் போட்டியில், "இருவர் கண்டனர்' என்ற நாடகத்துக்காக இரண்டாம் பரிசைப் பெற்றுள்ளார்.
- "பபாசி' அமைப்பு சார்பில் ரூ.1 லட்சம் பரிசு 2009 ஆண்டில் இவருக்கு வழங்கப்பட்டது. பரிசை ஏற்றுக்கொண்ட அவர், பல்வேறு சேவை நிறுவனங்களுக்கு அந்தத் தொகையைப் பிரித்து வழங்கினார்.
நூல்கள்
சிறுகதைகள்
- ஒளியின் முன்
- என்ன மாயமோ
- பணம் பறித்த செல்வம்
- அவன் வடிவம்
- படிகள்
- உடன் பிறப்பு
- அந்த நேரம்
- ஓர் இந்தியன் இறக்கிறான்
- உலகத்திடம் என்ன பயம்
- நாகலிங்க மரம் (தேர்ந்தெடுத்த கதைகள்)
- சூடாமணி கதைகள்
குறுநாவல்கள்
- விடிவை நோக்கி
- ஆழ்கடல்
- சோதனையின் முடிவு
- வாழ்த்துவோம்
- உள்ளக்கடல்
- இரவுச்சுடர்
- முக்கோணம்
நாவல்கள்
- மனதுக்கு இனியவள்
- புன்னகைப் பூங்கொத்து
- நீயே என் உலகம்
- தீயினில் தூசு
- தந்தை வடிவம்
- மானிட அம்சம்
- கண்ணம்மா என் சகோதரி
- இரவுச்சுடர்
- உள்ளக் கடல்
நாடகங்கள்
- இருவர் கண்டனர்
- அருணோதயம்
- அருமை மகள்
நாடகங்கள்
- இருவர் கண்டனர் என்ற நாடகம் ஆனந்த விகடன் நடத்திய நாடகப் போட்டியில் இரண்டாம் பரிசைப் பெற்றது.
- மும்பை தமிழ்ச் சங்க விருதும் இவருக்கு வழங்கப்பட்டது.
- 2009-ஆம் ஆண்டு நடைபெற்ற புத்தகக் காட்சியில் தென்னிந்திய புத்தக விற்பனையாளர்கள் மற்றும் பதிப்பாளர்கள் சங்கம் விருது
- 2001-இல் வெளியான "ஆர்.சூடாமணி கதைகள்' என்னும் சிறுகதைத் தொகுப்புக்காக தமிழ் வளர்ச்சித் துறையின் பரிசு வழங்கப்பட்டது.
மறைவு
2010-ஆம் ஆண்டு செப்டம்பர் 13-ஆம் தேதி சூடாமணி காலமானார்.
