திருவேங்கடம் (தெருக்கூத்து)
திருவேங்கடம் (பிறப்பு: அக்டோபர் 10, 1941) தமிழ் தெருக்கூத்துக் கலைஞர்களில் ஒருவர். தெருக்கூத்து மற்றும் நாடகப் பிரதி உருவாக்குனர்.
வாழ்க்கைக் குறிப்பு
திருவேங்கடம் தமிழ்நாட்டின் திருவண்ணாமலை மாவட்டம் செய்யாறில் அக்டோபர் 10, 1941-ல் பிறந்தார். தந்தை முனுசாமி கூத்துக் கலைஞர். ஐந்தாம் தலைமுறை கூத்துக் கலைஞர். முன்னோர் மாசிலாமணி கவிராயர், தங்கவேலு வாத்தியார், தாத்தா லட்சுமணதாசர் ஆகியோர் பிரதி உருவாக்குனர்கள். திருவேங்கடம் பத்தாம் வகுப்பு வரை பயின்றார். புலவர் படிப்பைத் தொலைதூரக் கல்வி மூலம் பயின்றார்.
கலை வாழ்க்கை
கூத்து
மூன்றாம் வகுப்பு படித்துக் கொண்டிருந்தபோதே தந்தை முனுசாமியுடன் கூத்து நடக்கும் இடங்களில் பிரதி உருவாக்க உதவுவதில் ஈடுபட்டார். ஆரணி பக்கத்தில் வாழ்ந்த குப்புசாமிப் புலவர் இவரின் ஞான ஆசிரியர். இவர் மூலம் வீரமாமுனிவரின் சதுரகராதி, நிகண்டுகளை வாசித்தார். முன்னோர்கள் மூலம் தெருக்கூத்திற்கு பிரதி எழுதவும், தனிப்பட்ட ஆர்வத்தால் நாடகத்திற்கு (நாவல்ஸ்) பிரதி எழுதவும் கற்றுக் கொண்டார். ராமாயணத்திலும், மகாபாரதத்திலும், புராணத்திலும் இயல்பாக கூத்துப் பிரதிகளை எழுதினார்.
கண்ணப்ப தம்பிரான் கூத்து குழுவிற்காக பதினாறு கூத்துப் பிரதிகளை உருவாக்கினார். இந்திரஜித், தக்கயாகம், சூர்ப்பனகை சபதம், காண்டகாவனத் தகனம் ஆகியவை இவர் எழுதிய கூத்துப் பிரதிகளில் சில. இவருடைய கூத்துப் பிரதிகளைக் கொண்டு கண்ணப்ப தம்பிரான் பிரான்ஸ், நார்வே அகிய இடங்களில் கூத்து அரங்கேற்றம் செய்தார்.
நாடகம்
திருவேங்கடம் 162 நாடகப் பிரதிகள் எழுதினார். ஆன்மிகம், சமூகம் சார்ந்த கருத்துக்களை மையமாகக் கொண்டு நாடகங்களை எழுதினார். ராஜா என்பவர் நாடகப் பிரதிகளில் காட்சி, வசனம் சார்ந்து எழுதுவதற்கான் உத்திகளை இவருக்கு கற்றுக் கொடுத்தார். முதன்முதலில் எஸ்.ஆர். ராமகிருஷ்ணனுக்கு புத்தர் ஆசிய ஜோதி, நீதியின் கண்கள் ஆகிய நாடகங்களை எழுதி அளித்தார். தோணிமோடு மார்க்கபந்து இவரை பிரபலமாக்கினார்.
விருது
- காஞ்சி கலை இலக்கிய வளர்ச்சி மன்றத்தின் சார்பில் மாசிலாமணி வாத்தியார் விருது
எழுதிய கூத்துப் பிரதிகள்
- இந்திரஜித்
- தக்கயாகம்
- சூர்ப்பனகை சபதம்
- காண்டகாவனத் தகனம்
உசாத்துணை
🔏Being Created
Please do not write any content below this line. This section is only for editing templates & categories.
