அலோபதி மருத்துவ இதழ்கள் பட்டியல்: Difference between revisions

Revision as of 11:33, 21 October 2026

தமிழில் அலோபதி மருத்துவச் செய்திகளைத் தாங்கி வரும் இதழ்கள் அலோபதி மருத்துவ இதழ்கள் எனப்படுகின்றன.

தமிழில் அலோபதி மருத்துவ இதழ்கள்

இரேனியஸ் பாதிரியார், 1818-ல், கிறிஸ்தவ அறிவுப் பரப்பும் சங்கம் Society for propagating christian knowlodge மூலம் காலரா நோய் பற்றிய துண்டறிக்கையை வெளியிட்டார். பெர்சிவல் பாதிரியார் 1855-ம் ஆண்டு தினவர்த்தமானி இதழைத் தொடங்கினார். தினவர்த்தமானி அறிவியல் கட்டுரைகளையும், சுகாதாரம், பொது மருத்துவம் பற்றிய கட்டுரைகளையும் வெளியிட்டது. தினவர்த்தமானியைத் தொடர்ந்து ஜனவிநோதினி இதழ் 1870-ல் வெளிவந்தது. சுமார் இருபது ஆண்டுகள் வெளிவந்த ஜனவிநோதினி இதழில் தொற்று நோய்த் தடுப்புமுறை, கள்ளுண்ணாமை போன்ற நோய்த் தடுப்புகளைப் பற்றிய கட்டுரைகள் வெளியாகின. மருத்துவம், சுகாதாரம் பற்றிய அறிவியல் கருத்துக்களை வாழ்வியல் நெறிகளுடன் இணைத்து ஜனவிநோதினி வெளியிட்டது. தொடர்ந்து 'விவேகசுந்தரம்' இதழும் 1892- வெளிவந்த 'விவேகசிந்தாமணி' இதழும் மருத்துவம், சுகாதாரம் சார்ந்த கட்டுரைகளை வெளியிட்டன. தமிழின் முதல் மருத்துவ இதழாக 'அகத்திய வர்த்தமானி' கருதப்படுகிறது. இது சென்னையிலிருந்து வெளிவந்தது. தொடர்ந்து பல மருத்துவ நூல்கள் வெளியாகின.