லட்சுமி ராஜரத்னம்
லட்சுமி ராஜரத்னம் (மார்ச் 27, 1942 - பிப்ரவரி 8, 2021) எழுத்தாளர், நாடக ஆசிரியர், சொற்பொழிவாளர், ஆன்மிக உபன்யாசகர், இசைக்கலைஞர். பொது வாசிப்புக்குரிய பல சிறுகதைகளை, நாவல்களை எழுதினார். ஆன்மிக நூல்கள் பலவற்றை எழுதினார். 40 வரலாற்றுக் கதைகளை எழுதிய ஒரே பெண் எழுத்தாளராக அறியப்படுகிறார். சொற்சுவை நாயகி விருது உள்பட பல்வேறு விருதுகள் பெற்றார்.
பிறப்பு, கல்வி
லட்சுமி ராஜரத்னம், மார்ச் 27, 1942 அன்று திருச்சி சிந்தாமணியில், அனந்தசுப்ரமணியன் – ராஜலக்ஷ்மி இணையருக்குப் பிறந்தார். திருச்சியில் பள்ளிக் கல்வி கற்றார். பி.யூ.சி. படித்தார்.
தனி வாழ்க்கை
லட்சுமி ராஜரத்னம் மணமானவர். கணவர் ஜி.எஸ். ராஜரத்னமும் ஓர் எழுத்தாளர். மகள் ராஜசியாமளா பிரகாஷ் நாட்டியக் கலைஞர், எழுத்தாளர்.
இலக்கிய வாழ்க்கை
லட்சுமி ராஜரத்னம், தந்தை வாங்கி வந்த கல்கி, கலைமகள், ஆனந்த விகடன் போன்ற இதழ்களை வாசித்து இலக்கிய ஆர்வம் பெற்றார். லட்சுமி ராஜரத்னத்தின் முதல் படைப்பு ’மட்டுவார் குழலி’ என்னும் நாடகம். இது அகில இந்திய வானொலியில் ஒலிபரப்பானது. முதல் சிறுகதை, ’அஜ்மல்கான் ரோட்’, சாவி, தினமணி கதிர் ஆசிரியராக இருந்தபோது இயக்குநர் கே. பாலசந்தரின் விமர்சனக் குறிப்புடன் வெளியானது. தொடர்ந்து பல சிறுகதைகளை, நாவல்களை, தொடர்களை எழுதினார். ஆனந்தவிகடன், கல்கி, மங்கையர் மலர், அமுதசுரபி, தினமலர், தினத்தந்தி, இதயம் பேசுகிறது. குங்குமம் எனப் பல இதழ்களில் எழுதினார்.
லட்சுமி ராஜரத்னம் எழுதிய ‘இதயக்கோயில்’ நாவல் கலைமகள் நாராயணஸ்வாமி ஐயர் பரிசு பெற்றது. பல நாவல்களுக்கிடையே சிறந்த நாவலாக இதனைத் எல்லார்வி, தேர்ந்தெடுத்தார். இந்த நாவல், மாயாவி, நா.பா. அகிலன், கி.வா.ஜ. சாண்டில்யன் உள்ளிட்ட சக எழுத்தாளர்களால் பாரட்டப்பட்டதுடன் லட்சுமி ராஜரத்னத்திற்குச் சிறந்த புகழையும் தேடித் தந்தது.
தினமணி கதிரில் அதிகம் சிறுகதைக, தொடர்கதைகளை எழுதினார். தினமணி கதிரின் ஆசிரியர்களாக இருந்த கே.ஆர். வாசுதேவன், நா. பார்த்தசாரதி, கி. கஸ்தூரிரங்கன் லட்சுமி ராஜரத்னத்தின் எழுத்துக்களைத் தொடர்ந்து வெளியிட்டு ஊக்குவித்தனர்.
லட்சுமி ராஜரத்னத்தின் ’அகலிகை காத்திருந்தாள்’, ’பாட்டுடைத் தலைவி’, ’அவள் வருவாளா’ போன்ற நாவல்கள் சிறந்த வரவேற்பைப் பெற்றன. குடும்பக் கதைகள் தான் என்றில்லாமல் துப்பறியும் கதைகளும், க்ரைம் கதைகளும், வரலாற்றுக் கதைகளும் எழுதினார். ஆண் எழுத்தாளர்களுக்கு நிகராக 40 வரலாற்றுக் கதைகளை எழுதிய ஒரே பெண் எழுத்தாளர் லட்சுமிராஜரத்னம்.
🔏Being Created
Please do not write any content below this line. This section is only for editing templates & categories.
