அப்புசாமி- சீதாப்பாட்டி
அப்புசாமி - சீதாப்பாட்டி (1963 - 2017) எழுத்தாளர் ஜ.ரா. சுந்தரேசன் பாக்கியம் ராமசாமி என்னும் பெயரில் உருவாக்கிய கற்பனைக் கதாபாத்திரங்கள். கதைகளாகவும் படக்கதைகளாகவும் குமுதம் இதழில் தொடர்ந்து வெளிவந்த இக்கதைகள் புகழ்பெற்றவை.
எழுத்து, வெளியீடு
முதன்முதலாக 1963-ஆம் ஆண்டு குமுதம் இதழில் வெளிவந்த சிறுகதைகளில் இக்கதாபாத்திரம் அறிமுகப்படுத்தப்பட்டது. பின்னர் வெவ்வேறு கதாபாத்திரங்கள் இணைக்கப்பட்டு விரிவாக்கப்பட்டது. தொலைக்காட்சித் தொடராகவும் வெளிவந்தது. இக்கதைகளை எழுதுவதற்காக ஜ.ரா. சுந்தரேசன் தன் தந்தை தாயின் பெயர்களை இணைத்து பாக்கியம் ராமசாமி என்று வைத்துக்கொண்டார். 1963-ல் வெளிவந்த அப்புசாமியும் ஆப்ரிக்க அழகியும் என்னும் நாவலே இக்கதாபாத்திரங்கள் தோன்றிய முழுநீளக்கதை. இக்கதைகளுக்கு படங்கள் வரைந்தவர் குமுதத்தில் கதைகளுக்கு கதையோவியம் வரைபவரான ஜெயராஜ். அப்புசாமி - சீதாப்பாட்டி இருவருக்கும் அவர் முகம் அளித்தார்.
கதைமாந்தர்
- அப்புசாமி - சீதாப்பாட்டி: கதைகளில் திரும்பத் திரும்ப வரும் கதாபாத்திரங்கள்
- அப்புசாமி - அப்பாவித்தனமும் துடுக்குத்தனமும் கொண்ட கிழவர். சென்னை குடிசைப்பகுதி மொழி பேசுபவர்
- சீதாப்பாட்டி - உயர்மட்ட பிராமணப் பழக்கவழக்கங்களும் தோரணையும் கொண்ட அவர் மனைவி
- ரசகுண்டு - சமையற்காரன், அப்புசாமியின் நண்பன்
- ருக்மிணி - ரசகுண்டுவின் மனைவி
- பீமாராவ் - கன்னடம் பேசும் பயில்வான். ரசகுண்டுவின் தோழன்
- அரைபிளேடு பக்கிரி - பிக்பாக்கெட் அடிக்கும் குடிசைப்பகுதி ஆள்.
- கீதாப்பாட்டி -அப்புசாமி மேல் பரிவு கொண்டவள். சீதாப்பாட்டியின் கிளப் தோழி
- அகல்யா சந்தானம் - சீதாப்பாட்டியின் கிளப் தோழி. சீதாப்பாட்டியை மட்டம் தட்டுபவள்
ஊடகம்
அப்புசாமி சீதாப்பாட்டி கதைகள் தொலைக்காட்சியில் காத்தாடி ராமமூர்த்தி அப்புசாமியாக நடிக்க ஒளிபரப்பாயின.
அமைப்பு
ஜ.ரா.சுந்தரேசன் அப்புசாமி சீதாப்பாட்டி நகைச்சுவை மன்றம் என்று ஓர் அமைப்பை நடத்தினார்.
நாவல்கள்
- அப்புசாமியும் ஆப்பிரிக்க அழகியும்
- 1001 அப்புசாமி இரவுகள்
- மாணவர் தலைவர் அப்புசாமி
- அப்புசாமியும் அற்புத விளக்கும்
- பாமர கீதை
- சுண்டைக்காய் சித்தர் அப்புசாமி
- அப்புசாமி படம் எடுக்கிறார்
- பீரோவின் பின்னால்
- ஆகஸ்ட் தியாகி அப்புசாமி
- சீதாப்பாட்டியின் சபதம்
- வீரப்பன் காட்டில் அப்புசாமி
- ஆகாசவாணியில் அப்புசாமி
- அப்புசாமி டைவர்ஸ் கேட்கிறார்
- கம் ஆன் அப்புசாமி கம் ஆன்
- மனித வெடிகுண்டு அப்புசாமி
- அப்புசாமியின் கலர் டிவி
- அப்புசாமியும் ஹிப்னாடிச பூனையும்
- அப்புசாமியும் அழகிப் போட்டியும்
- அப்புசாமியின் தாலி பாக்கியம்
- அப்புசாமியும் பாரதி நாற்காலியும்
உசாத்துணை
✔ Second review completed
Please do not write any content below this line. This section is only for editing templates & categories.
